Batys Qazaqstanda boranǵa baılanysty Samara – Shymkent joly jabyldy
«QazAvtoJol» JShS BQO fılıalynyń málimeti boıynsha 16 naýryz kúni jergilikti saǵat 08.00-den bastap aýa raıynyń nasharlaýyna baılanysty respýblıkalyq mańyzy bar Samara-Shymkent (266-394 km, Podstepnyı aýylynan Jympıtyǵa deıin) jolynda barlyq kólik túrleri úshin qozǵalysqa shekteý qoıyldy.
Jabylý sebebi – boran, joldyń nashar kórinýi.
Budan buryn dál osyndaı sebeppen túngi saǵat 00.00-den atalmysh joldyń Jympıtydan Aqtóbe oblysyna deıingi aralyǵy (394-525 km) jabylǵan edi.
Osyǵan baılanysty BQO TJ departamenti atalǵan baǵytta turǵyndarǵa jolǵa shyqpaý kerektigin jetkizdi.
Sonymen qatar saǵat 08.30-den bastap respýblıkalyq mańyzy bar Oral-Atyraý, Podstepnyı-Fedorov-RF shekarasy, Oral-Tasqala-RF shekarasy joldarynda da qozǵalysqa shekteý qoıyldy.
Eske sala keteıik, budan buryn Batys Qazaqstanda respýblıkalyq joldarda kólik qozǵalysyna tyıym salynǵanyn jazǵan bolatynbyz.