Batys Qazaqstanda bolashaq dárigerlerdi bıýdjet esebinen oqytý qolǵa alynbaq
ORAL. QazAqparat - Batys Qazaqstan oblysynda jergilikti bıýdjet esebinen medıtsına kadrlaryn júıeli túrde oqytý qolǵa alynbaq. Bul týraly búgin oblystyq qazaq drama teatrynda Medıtsına qyzmetkerleriniń kúnine arnalǵan saltanatty jınalysta oblys ákimi Altaı Kólginov málim etti, dep habarlaıdy «QazAqparat» tilshisi.
Óńir basshysynyń aıtýynsha, osyǵan deıin kadr tapshylyǵy máselesin sheshý úshin oblystyq densaýlyq saqtaý basqarmasynyń ókilderi jyl saıyn Aqtóbe, Astana, Almaty qalalaryndaǵy medıtsına ýnıversıtetterine baryp, túlekterimen kelisip, olardy óńirge jumys jasaýǵa shaqyratyn.
Endigi jerde batysqazaqstandyq mektep túlekterin ózge aımaqtardaǵy JOO-larda qajetti mamandyqtar boıynsha bıýdjet qarjysyna oqytýǵa múmkindik bar. Olar 5-7 jyldan keıin oqýlaryn bitirip kelip, osynda taǵylymdamadan ótip, jumysqa tura alady. Oralda medkolledj bolǵandyqtan, orta býyn kadrlaryna tapshylyq joq, al joǵary bilimdi dárigerler, ásirese, aýyldyq jerlerde qajet.
Kúni búgin oblysta 1500-den astam dáriger, 5500-den astam orta býyn medıtsına qyzmetkeri 640 myńdaı turǵynǵa qyzmet kórsetýde. Elbasynyń «100 naqty qadam» Ult josparynda, sondaı-aq 2016-2019 jyldarǵa arnalǵan «Densaýlyq» baǵdarlamasynda sala aldynda turǵan mindetter naqty kórsetilip, osy zamanǵy ozyq tehnologııalar negizinde qyzmet sapasyn arttyrýǵa, materıaldyq-tehnıkalyq bazany jaqsartýǵa, mindetti áleýmettik medıtsıalyq saqtandyrýdy engizýge aıryqsha kóńil bólingen. Densaýlyq saqtaý salasyna memleket tarapynan turaqty nazar aýdarylyp keledi. Elimiz táýelsizdik alǵannan bergi kezeńde óńirdegi densaýlyq saqtaý bıýdjeti myńnan astam esege ósti. Mysaly, bastapqy kezde ol kórsetkish 22 mln. teńge ǵana bolsa, ótken jyly 27 mlrd., bıyl 30 mlrd. teńgeden asyp otyr. Memleket basshysynyń tapsyrmasyna sáıkes ótken jyly qazirgi zamanǵy talaptarǵa tolyq sáıkes keletin qalalyq kóp beıindi aýrýhana paıdalanýǵa berilse, 1,6 mlrd. teńgege 140 tehnıka alyndy. 2016 jyly 4 densaýlyq saqtaý nysany kúrdeli jóndelse, bıyl taǵy 21 medıtsına mekemesi qaıta jańǵyrtylmaq. Sonda eki jylda 25 nysan kúrdeli jóndelmek, bul maqsatqa 1,5 mlrd. teńge bólindi.
Saltanatty jıynda sala úzdikteri «Eńbek ardageri» medalimen, oblys ákiminiń alǵyshattarymen, QR Densaýlyq saqtaý mınıstrliginiń «Densaýlyq saqtaý isine qosqan úlesi úshin», «Densaýlyq saqtaý isiniń úzdigi» tósbelgilerimen, qurmet gramotalarymen marapattaldy.
