Batys Qazaqstanda blokpostarda 380-nen astam karantın talabyn buzýshylyq anyqtady

ORAL. QazAqparat – Batys Qazaqstan oblysynda polıtsııa qyzmetkerleri blokpostarda karantın talabyn buzýshylyqtyń 383 deregin anyqtady, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, oblysta 1 mamyrdan bastap epıdemıologııalyq jaǵdaıdy baǵalaý matrıtsasyna saı «qyzyl» aımaqta ornalasqan Oral qalasy, Aqjaıyq, Báıterek, Bórli, Kaztalov, Terekti jáne Shyńǵyrlaý aýdandarynyń kireberisterinde ornatylǵan 21 blokpost qyzmet etýde.

Departament basshysynyń aıtýynsha, turǵyndar tarapynan karantın talaptaryn buzýshylyq áli de tyıylar emes. Blokpostar epıdemıologııalyq ahýal jaqsarǵan jaǵdaıda ǵana alynatyn bolady.

Óńirde indet bastalǵaly 19960, 1 mamyrdan beri 620 adamnyń koronavırýs juqtyrǵany anyqtaldy.

Mamyrda JRVI belgileri boıynsha tekserilgen 338 (54,5 paıyz), buryn aýyrǵandarmen qarym-qatynasta bolǵan 208 (33,5 paıyz), profılaktıkalyq maqsatta qaralǵan 69 (11,1 paıyz) jáne vahtalyq aýysymnan shyǵarda ne kirerde, shetelge keterde, sondaı-aq statsıonarǵa jatqyzar aldynda synama alynǵan 5 (0,8 paıyz) adamnan kovıd tabyldy.

Sońǵy táýlikte 151 naýqas tirkeldi. Sońǵy aptada (29 sáýir – 5 mamyr) aldyńǵymen (22-28 sáýir) salystyrǵanda, vırýs juqtyrý kórsetkishi 15,9 paıyzǵa (1107-den 930-ǵa) tómendedi.

Osy aıda 11495 PTR test zertteýleri (kúnine orta eseppen 2299) júrgizildi.

Mamyrda memlekettik shekaradan barlyǵy 5920 adam ótse, sonyń 1619-y – jolaýshylar. Anyqtamasyz ótken 70 jolaýshy karantın statsıonaryna jatqyzyldy, test qorytyndysyna sáıkes eshqaısysynan vırýs tabylǵan joq. Al halyqaralyq júk tasymalymen aınalysatyn 2792 júrgizýshiniń 423-inde anyqtama bolǵan joq. Solardyń ekeýinen koronavırýs anyqtaldy.

«Oblysta monıtorıngtik toptar da óz jumystaryn jalǵastyrýda. 1 mamyrdan bastap 39 reıd júrgizilip, 166 nysan qamtyldy. 1 nysanda karantın talabyn buzýshylyq anyqtaldy. 4 hattama toltyrylyp, 175 myńnan astam teńgege aıyppul salyndy», dedi M.Aryspaev.

Eske sala keteıik, budan buryn Batys Qazaqstanda bir aptada myńǵa jýyq adamnyń koronavırýs juqtyrǵanyn jazǵan bolatynbyz.