Batys Qazaqstanda bıyl jańadan birneshe mektep iske qosylmaq
ORAL. QazAqparat – Batys Qazaqstan oblysynda bıyl jańadan birneshe mektep iske qosylmaq, dep habarlaıdy QazAqparat tilshisi.
BQO bilim basqarmasynyń basshysy Aıymgúl Trjanovanyń aıtýynsha, bul úsh aýysymdy jáne apatty jaǵdaıdaǵy mektepter sanyn qysqartý maqsatynda qolǵa alynyp otyr.
Oblys ortalyǵy Oral qalasynyń ózinde 11356 oqýshyny qamtıtyn 8 úsh aýysymdy mektep bar. Jalpy, shahardaǵy oqýshy ornynyń tapshylyǵy 2281 oryndy quraıdy.
Osy máseleni sheshý baǵytynda bıyl qalada 900 oryndyq №51 orta mektep ǵımaraty paıdalanýǵa beriledi.
Taǵy bir túıtkildi másele – apatty mektepter jaǵdaıy. Óńirde 3752 oqýshy bilim alatyn 10 apatty jaǵdaıdaǵy mektep bar.
Bıyl Aqjaıyq aýdany Chapaev aýylynda apatty mekteptiń ornyna 100 oryndyq ınternatymen 300 oryndyq jańa bilim ordasy óz esigin aıqara ashady.
Sondaı-aq Qaztalov aýdany Qaztalov aýylynda 600 oryndyq A.Orazbaeva atyndaǵy orta mekteptiń qurylysy bastaldy. Qurylysy aldaǵy jyly aıaqtalatyn nysanǵa respýblıkalyq bıýdjetten 2319,2 mln teńge bólindi.
Oǵan qosa «Jumyspen qamtýdyń jol kartasy» baǵdarlamasy aıasynda 4 bilim berý nysanynyń qurylysy men qaıta qurý jumystary úshin el qazynasynan 1 mlrd 47,132 mln teńge qarastyrylǵan bolatyn. Bul qarjyǵa Oral qalasynda apatty ǵımarat súrilip tastalyp, ornyna 300 oryndyq №33 mektep jańadan salynýda. Muny da bıyl iske qosý kózdelýde. Sol sekildi Báıterek aýdany Zelenov orta mektebi ǵımaraty qaıta qurylyp, Bókeı ordasy aýdany Bórli aýylyndaǵy M.Begalıeva atyndaǵy mekteptiń eki ǵımaratynyń arasyna jabyq ótkel, Jánibek aýdany Jánibek aýylynda A.Orazbaeva atyndaǵy orta mekteptiń sport zaly salynady.
Munyń syrtynda ınvestorlar esebinen taǵy eki mektepti ashý oılastyrylýda.
«Taǵy bir qýanyshty jaıt, oblys basshylyǵynyń qoldaýymen bilim ordalaryn kúrdeli jóndeýge aıryqsha kóńil bólinip otyr. Jalpy, oblysta 86 mektep kúrdeli jóndeýdi qajetsinedi. 2018 jyly úsh mektep kúrdeli jóndelse, ótken jyly da osy kórsetkish saqtalǵan edi. Al bıyl 86 mekteptiń 30 -yna kúrdeli jóndeý júrgizilgeli otyr. Atap aıtqanda, «Aýyl – el besigi» baǵdarlamasy aıasynda 4 mektepti kúrdeli jóndeýge 782,235 mln teńge qaralsa, «Jumyspen qamtýdyń jol kartasyna» sáıkes 26 mektepke 8 mlrd 245,719 mln teńge bólindi», dedi QazAqparat tilshisine Aıymgúl Maqsotqyzy.
