Batys Qazaqstanda bıyl koronavırýs juqtyrǵandar sany 10 myńǵa jýyqtady
ORAL. QazAqparat – Batys Qazaqstan oblysynda jyl basynan beri 9964 adam koronavırýs juqtyrdy, dep habarlaıdy QazAqparat tilshisi.
BQO densaýlyq saqtaý basqarmasy málim etkenindeı, sonyń 6269-ynda aýrý belgisi bolsa, 3695-i – sımptomy joqtar.
Aýyrǵandardyń 59,2 paıyzy (5899) Oral qalasynda, 12 paıyzy (1203) Báıterek, 10,7 paıyzy (1068) Bórli aýdanynda tirkelgen.
Basqarma málimetine qaraǵanda, óńirde 1118 tósektik 17 ınfektsııalyq statsıonarda 580 adam jatyr. Aýrýhanalar 51,8 paıyzǵa, sonyń ishinde qaladaǵy statsıonarlar 78,8 (595 tósekte 469), aýdandaǵy emdeý oryndary 21,2 (523 tósekte 111 naýqas) paıyzǵa tolǵan. 65 tósektik jansaqtaý bólimshesinde 38 adam (58,4 paıyz) em alýda.
Oblysta rezerv retinde 1449 (684-i ınfektsııalyq, 765-i karantındik) tósek-oryn ázirlengen.
Óńirde kovıdti anyqtaıtyn 13 zerthana bar. Sońǵy táýlikte 2209 zertteý júrgizildi.
«Іndet bastalǵannan beri Batys Qazaqstan oblysynda barlyǵy 19185 adam tirkelse, sonyń 15004-i saýyǵyp shyqty. 278 adam kóz jumdy. Sońǵy táýlikte 155 adamnyń koronavırýs juqtyrǵany anyqtalsa, 113 naýqas emdelip shyqty», dep habarlady vedomstvodan.
Eske sala keteıik, budan buryn Batys Qazaqstanda 6 mekteptiń karantınge jabylǵanyn, 107 adamnyń kóz jumǵanyn, jyljymaly egý keshenderi jumys jasap jatqanyn jazǵan bolatynbyz.
Sondaı-aq Oral qalasynda jazasyn óteýshiler koronavırýsqa qarsy ekpe saldyrdy.
