Batys Qazaqstanda bıyl 484,9 myń sharshy metr turǵyn úı paıdalanýǵa berilmek
Memleket basshysy Qasym-Jomart Toqaev bıylǵy Joldaýynda el turǵyndarynyń baspana máselesin tezirek sheshý kerektigin atap kórsetken bolatyn.
Oblystyq qurylys basqarmasynyń basshysy Álibek Antazıevtiń aıtýynsha, memlekettik qoldaý arqyly jyl aıaǵyna deıin 9 kópqabatty úı (1481 páter) jáne aýyldarda 89 ú ı (225 páter), barlyǵy 1706 páter iske qosylmaqshy.
Osynyń ishinde 519-y jergilikti atqarý organdarynda kezekte turǵandarǵa, 1187-si turǵyn úı qurylys jınaq banki salymshylaryna beriledi.
Basqarma basshysynyń sózine qaraǵanda, «Nurly jer» memlekettik baǵdarlamasy 2017-2019 jyldary óńirdegi turǵyn úı qurylysyna tyń serpin berdi. Osy kezeńde 1,3 mln sharshy metr turǵyn úı boı kóterdi. Іske qosylǵan turǵyn úı kólemi 392,2 myńnan 484,9 myń sharshy metrge jetti. Investıtsııa 418,5 mlrd teńgeni qurasa, bul da 111,9 mlrd teńgeden 173,1 mlrd teńgege deıin kóbeıdi. Osy jyldary 5810 turǵyn úı salyndy.
Bıyldan bastap Qazaqstanda «5-10-25» baǵdarlamasy júzege asyrylyp jatqany belgili. Batys Qazaqstan oblysynda «Shańyraq» pılottyq jobasy boıynsha nesıelik úı qurylysyna 2020 jyly 6 mlrd teńge bólindi. BQO úshin oblıgatsııalyq zaıym esebinen turǵyzylatyn úıdiń 1 sharshy metriniń quny 160 myń teńgeni quraıdy. Qazirgi tańda atalǵan qarjyǵa 6 kópqabatty turǵyn úı (666 páter) salý josparlanýda. Sonyń úsheýiniń qurylysy bastalyp ketti.
«Memleket tarapynan mamandardy aýyldyq jerge tartýdyń bir joly – aýylda turǵyn úı salý. Bul rette úlgi jobany qoldaný, salynatyn úı kólemin 100 sharshy metrden, al onyń qunyn 10 mln teńgeden asyrmaý, sondaı-aq aýdan ortalyǵynan 80 shaqyrymnan artyq qashyqta bolmaýy negizgi talaptar bolyp esepteledi. Úı qunynyń 50 paıyzy
sýbsıdııalanady», dedi Á.Antazıev.
Óńirde turǵyn úı qurylysyn yntalandyrý úshin jyl saıyn ınjenerlik-kommýnıkatsııalyq jelini tartýǵa keminde 2 mlrd teńge bólinedi. 2017-2019 jyldary ınjenerlik-
kommýnıkatsııalyq jelimen 4 myńdaı jer telimi qamtyldy.
Joldaýǵa sáıkes turǵyndardy qoljetimdi baspanamen qamtamasyz etý máselesi budan bylaı da nazarda bolady.
Eske sala keteıik, budan buryn Oralda «Nurly jer» baǵdarlamasy aıasynda jańa qazandyq ornatylyp jatqanyn, BQO-da 342 myń gektar jerdiń paıdalanylmaı otyrǵanyn jazǵan bolatynbyz.