Batys Qazaqstanda birneshe dala órti sóndirildi
BQO TJ departamentiniń baspasóz qyzmetinen málim etkendeı, 9 shilde kúni saǵat 15.17-de Bórli aýdany Aqsý aýylynan 6 shaqyrym jerde Sýyqbulaq arnasy mańynda qurǵaq shóp órtendi.
«46 gektar aýmaqty qamtyǵan tilsiz jaýdy aýyzdyqtaýǵa órt sóndirýshilermen birge orman sharýashylyǵy mekemesi, erikti órt sóndirý qurylymdarynan barlyǵy 38 adam, 8 tehnıka jumyldyryldy. Órt 21.30-da oqshaýlanyp, 22.41-de sóndirildi. Sondaı-aq búgin saǵat 13.26-da Aqjaıyq aýdany Qaraýyltóbe aýyldyq okrýgi «Aıaq» sý qoımasy mańynda 25 gektar qurǵaq shóp otqa orandy. Bul órt te 36 adam, 6 tehnıkanyń qatysýymen saǵat 20.22-de joıyldy», - dep habarlady vedomstvodan.
Eske sala keteıik, budan buryn Batys Qazaqstanda jer órtenip jatqanyn jazǵan bolatynbyz.
BQO TJ departamenti málimeti boıynsha Terekti aýdany Saryómir aýylynan 10 shaqyrym qashyqtyqta eki jerde (Eginsaı – 45 ga, Kirpi – 40 ga) búgin shyqqan órt saǵat 16.20-da tolyqtaı aýyzdyqtaldy.