Batys Qazaqstanda birneshe avtokólik soqtyǵysyp, júrgizýshi jaraqat aldy
ORAL. QazAqparat – Batys Qazaqstan oblysynda birneshe avtokólik soqtyǵysyp, júrgizýshi jaraqat aldy, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, oqıǵa 19 naýryz kúni shamamen saǵat 12.07-de Bórli-Aqsaı jolynda boldy.
«Nıssan» avtokóliginiń 32 jastaǵy júrgizýshisi basyp ozamyn dep, «KamAZ» avtokóligimen soqtyǵysýǵa jol bergen. Sodan keıin «Aýdı» jáne «Toıota» avtokólikterimen túıisken.
Jol-kólik oqıǵasy saldarynan «Nıssan» júrgizýshisi túrli jaraqat aldy.
Oqıǵa ornynda polıtsııa qyzmetkerleri jumys istedi.
Oblystyq densaýlyq saqtaý basqarmasy baspasóz qyzmetiniń naqtylaýynsha, mıy shaıqalǵan júrgizýshi Bórli aýdandyq ortalyq aýrýhanasyna jatqyzyldy. Oǵan qosa ıyq súıegi synǵan, qos tizesinen jaraqat alǵan. Er adamdy odan ári emdeý úshin oblystyq kópbeıindi aýrýhanaǵa aýystyrady.
Eske sala keteıik, budan buryn BQO-da Samara-Shymkent jolynda kólik qozǵalysy shektelgenin jazǵan bolatynbyz.
