Batys Qazaqstanda birneshe aýdannyń ákimi aýysty
ORAL. 29 maýsym. QazAqparat - Memlekettik basqarý salasyndaǵy reformaǵa sáıkes Batys Qazaqstan oblysynda birneshe aýdannyń ákimi aýysyp, birqatary qaıta taǵaıyndaldy.
QR Prezıdenti Ákimshiliginiń kelisimimen jáne oblys ákimi Nurlan Noǵaevtyń ókimimen Abat Shynybekov Syrym aýdanynyń ákimi bolyp taǵaıyndaldy. Abat Abaıuly óńirde laýazymdy qyzmetter atqardy. Sońǵy jyldary «Nur Otan» HDP BQO fılıaly tóraǵasynyń orynbasary, Oral qalalyq máslıhatynyń hatshysy boldy. Osyǵan deıin aýdan ákimi mindetin munda bir jyldan astam ýaqyt boıy Rýslan Saparǵalıev atqardy.
Belgili sportshy Ashat Shaharov Qaratóbe aýdanyn basqaratyn boldy. Ol - sambodan úsh dúrkin álem chempıony, eki márte álem kýboginiń ıegeri, Qazaqstannyń eńbek sińirgen sport sheberi. Qazaq týrızm jáne sport akademııasynyń túlegi, ekonomıka ǵylymdarynyń kandıdaty. Sońǵy qyzmeti - Aqtóbe oblystyq olımpıada rezervterin daıarlaý ortalyǵynyń dırektory. Qaratóbe aýdanyna buǵan deıin úsh jylǵa jýyq ýaqyt boıy Naýryzbaı Qaraǵoıshın jetekshilik etti.
Zelenov aýdanynda Marat Ońǵarbekovtiń ornyna osyǵan deıin BQO jumyldyrý ázirligi, azamattyq qorǵanys, apattar men dúleı zilzalalardyń aldyn alýdy jáne joıýdy uıymdastyrý basqarmasyn basqarǵan Kárim Jaqypov, Bókeı ordasynda Nurlan Sabyrovtyń ornyna Aqjaıyq aýdany ákiminiń orynbasary qyzmetin atqaryp kelgen Nurlan Rahymjanov taǵaıyndaldy. Jańa aýdan basshylaryn oblys ákimi Nurlan Noǵaev sol aımaq aktıvterine tanystyryp, qyzmetterine sáttilik tiledi. Burynǵy aýdan ákimderine alǵys aıtyldy.
Aqjaıyq, Tasqala, Jańaqala aýdandarynyń ákimderi Narıman Tóreǵalıev, Qýat Mýsın, Lavr Haıretdınov óz qyzmetterine qaıta taǵaıyndaldy.
Aýdandarda aýys-túıis odan ári jalǵasýda.
