Batys Qazaqstanda birneshe adam sýǵa ketti
ORAL. QazAqparat - Batys Qazaqstan oblysynda sońǵy kúnderi birneshe adam sýǵa ketti, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimet boıynsha keshe tańerteń 09.30 shamasynda Aqjaıyq aýdany Býdarın aýylynda jergilikti eki turǵyn Býdarın kanalynan 1959 jylǵy azamattyń múrdesin taýyp shyǵarǵan.
Marqumnyń neden qaıtqany anyqtalý ústinde.
Budan bir kún buryn osy aýdannyń Aqsýat aýylynda 1960 jylǵy turǵynnyń denesi shyǵaryldy. Ol Jaıyq ózenine sýǵa túsýge bolmaıtyn jerden shomylamyn dep, saǵat 21.00-de batyp ketken.
BQO TJ departamentiniń jedel qutqarý jasaǵynan alynǵan málimetke qaraǵanda, 19 shilde kúni Oralǵa qarasty Rybtseh aýdany mańynda taǵy bir qaıǵyly oqıǵa boldy.
Eki er adam Shaǵan ózenin júzip ótpek bolǵan kezde bireýi jaǵaǵa jete almaı qalǵan. Qutqarýshylar saǵat 17.33-te shaqyrylǵan.
Oral qalalyq mádenıet jáne demalys saıabaǵynda oryn tepken qutqarý beketiniń qutqarýshylary oqıǵa ornyna eki mınýttan keıin jetken. Ókinishke qaraı, súńgýirler marqumnyń denesin ǵana alyp shyqty.
Sonymen qatar búgin Oralda tańerteń saǵat 07.40-ta qutqarýshylar shaqyrtylyp, Shaǵan ózeninde sý betinde qalqyp júrgen taǵy bir er adamnyń múrdesi tabyldy.
Eske sala keteıik, sońǵy kezde oblysta sýǵa ketý oqıǵalary jıilep tur. Budan buryn Aqjaıyq aýdanynda er adamnyń Jaıyq ózenine batyp ketkenin jazǵan bolatynbyz.
