Batys Qazaqstanda bir táýlikte 8 dala órti tirkeldi
ORAL. QazAqparat – Batys Qazaqstan oblysynda bir táýlikte 8 dala órti tirkeldi, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, Aqjaıyq, Báıterek, Tasqala aýdandary men Oral qalasynda Ysqyryqtaý (Svıstýn gora), «Sarytaý» shaǵynaýdany janyndaǵy jerler otqa orandy.
Atap aıtqanda, Aqjaıyq aýdany Býdarın aýyldyq okrýginde Baıboz 2 eldi mekeninde 46 ga, Alǵada 42 ga jerde qurǵaq shóp jandy.
Tasqala aýdany Mereı aýyldyq okrýginde Týrchınde – 33 ga, Krasnovta – 28 ga, Sladonda – 37, Aqbasta – 26 ga, Aqqaınarda – 29 ga, «Atamura» sharýa qojalyǵynda – 35 ga, «Nur» ShQ-da – 32 ga, «Alan» ShQ-da – 34 ga, «GSB Agro» JShS-da 23 ga qurǵaq shóp órtendi.
Báıterek aýdanynda Darııan kenti Naberejnaıa kóshesi 10-mekenjaıynda – 100 sharshy metr, Kóshim aýyldyq okrýgi Órken eldi mekeninde 23 ga, Şapov aýylynda «Jaına» ShQ-da 46 ga qurǵaq shóp kúlge aınaldy. Qarajar aýylynda Derkól ózeniniń jaǵalaýynda 17 ga qurǵaq shóp pen qamys jandy.
Oral qalasynda Ysqyryqtaýda 23 ga, «Sarytaý» mańynda 1 ga dala shóbi jalynǵa sharpyldy.
Dala órtterin sóndirýge jeke quramnan, sondaı-aq erikti órt sóndirý jasaqtarynan adamdar jumyldyryldy.
Sonymen qatar Oralda keshe keshkisin Komsomol kóshesi 96/2-mekenjaıynda turǵyn úı órtenip ketti.
Jeke turǵyn úıdiń tóbesi otqa oranǵany jóninde saǵat 20.10-da habar túsken. Órt aýmaǵy 80 sharshy metrdi qamtydy.
Jalyn kórshiles ornalasqan Ǵ.Qarash kóshesi 8/1 jáne 8-úılerdiń sharýashylyq qurylystaryn da (árqaısysy 5 sharshy metrden) sharpydy.
Órtti sóndirýge 21 adam, 4 tehnıka jumyldyryldy.
«Tilsiz jaý» 21.13-te oqshaýlanyp, 21.42-de aýyzdyqtaldy.
Eske sala keteıik, budan buryn BQO-da otyzdan astam saıajaı úıi janyp ketkenin jazǵan bolatynbyz.
