Batys Qazaqstanda bir otbasynyń bes adamy koronavırýs juqtyrdy
ORAL. QazAqparat – Batys Qazaqstan oblysynda bir otbasynan bes adam koronavırýs juqtyrdy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, úı karantıninde naýqastardyń ózin-ózi oqshaýlaý talaptaryn saqtamaýyna baılanysty koronavırýs juqtyrý jıilep otyr.
Atap aıtqanda, Bórli aýdanynda bir otbasydan – 5, Tasqalada – 4, Terektide 3 adamnan indet tabyldy.
Jeltoqsan aıynda 886 naýqas tirkelse, sonyń 518-i nemese 58,5 paıyzy Oral qalasynyń úlesine tıedi. Sondaı-aq Bórli (133, 15 paıyz) jáne Báıterek (103, 11,6 paıyz) aýdandarynda kóp tirkelip otyr.
M.Aryspaevtyń sózine qaraǵanda, óńirde 1-25 jeltoqsan aralyǵynda memlekettik shekaradan 23916 adam ótse, sonyń 4084-i – jolaýshylar. Anyqtamasyz ótken 721 jolaýshynyń tórteýinen koronavırýs anyqtaldy. Halyqaralyq júk tasymalymen aınalysatyn 12048 júrgizýshiniń 4175-inde anyqtama bolǵan joq. Bulardyń toǵyzynan indet tabyldy.
Sol sekildi jeltoqsan aıynda Germanııa men Egıpetten 6 halyqaralyq áýe reısi jáne Máskeýden bir charterlik reıs keldi. 483 jolaýshynyń ishinde anyqtamasy bolmaǵan 79-y karantındik statsıonarǵa ornalastyrylyp, synama alyndy. Olardyń bári de saý bolyp shyqty.
Osy aıda óńirde barlyǵy 38971 adam zerthanalyq tekserýden ótti. Al indet bastalǵaly 248129 adamnan synama alyndy. Kúni búgin oblys PTR dıagnostıkasy úshin 63837 zertteýge arnalǵan 1276 test júıesimen qamtamasyz etilgen.
«Jeltoqsan aıynda monıtorıngtik toptar 176 nysanda sanıtarlyq talaptyń buzylǵanyn anyqtady. QR Ákimshilik quqyqbuzýshylyq kodeksi 425-baby 1-bóligine sáıkes 87 hattama (sonyń ishinde 20-sy – kóp adamnyń qatysýymen ótken is-sharalar) toltyrylyp, 5 mln astam teńge kóleminde aıyppul salyndy. Bul baǵyttaǵy jumystardyń jalǵasyp jatqanyn eske sala otyryp, oblys turǵyndarynan jańajyldyq mereke kúnderi sanıtarlyq talapty saqtaýdy ótinemiz», dedi M.Aryspaev.
Eske sala keteıik, budan buryn BQO-da indet juqtyrǵan júkti áıeldiń alys aýdannan sanavıatsııamen jetkizilgenin jazǵan bolatynbyz.
