Batys Qazaqstanda bir kúnde jol apatynan eki adam qaza tapty
BQO polıtsııa departamentiniń baspasóz qyzmetinen málim etkendeı, eki jol-kólik oqıǵasy 31 tamyz kúni boldy.
Birinshi oqıǵa Tasqala aýdany aýmaǵynda, shamamen tańǵy saǵat 06.00-de Ozınkı-Oral avtojolynyń 10-shaqyrymynda oryn aldy.
1988 jylǵy júrgizýshi «Ford Vıýjen» avtokóliginiń rýline ıe bola almaı, 40 jastaǵy er adamdy qaǵyp ketti.
Er adam óz avtokóliginiń janynda, joldyń qarsy betinde turǵan. Ol alǵan jaraqattary saldarynan oqıǵa ornynda kóz jumdy.
Ekinshi oqıǵa sol kúni shamamen saǵat 07.55-te Samara-Shymkent jolynyń 446-shaqyrymynda Syrym aýdany aýmaǵynda boldy.
1976 jylǵy júrgizýshi «Daewoo Matiz» avtokóliginiń rýline ıe bola almaı, aýdarylyp qalǵan. Sonyń saldarynan júrgizýshi oqıǵa ornynda mert boldy.
Oǵan qosa túrli jaraqat alǵan 1984 jylǵy áıel men 2011 jylǵy er bala Syrym aýdandyq ortalyq aýrýhanasyna jetkizildi.
«Qazirgi kezde atalǵan derekter boıynsha QR QK 345-baby 3-bóligine sáıkes sotqa deıingi tergeý amaldary júrgizilýde. Polıtsııa departamenti júrgizýshiler men jaıaý júrginshilerge jol erejesin qatań saqtaý kerektigin eske salady. Avtokólik qozǵalysy kezinde mindetti túrde qaýipsizdik beldigin qoldaný qajet», - dep habarlady vedomstvodan.
BQO densaýlyq saqtaý basqarmasy baspasóz qyzmetiniń naqtylaýynsha, 1984 jylǵy áıel aýyr jaraqat almaǵan, ambýlatorlyq em alýǵa joldandy.
11 jasar bala oblystyq kópbeıindi balalar aýrýhanasyna aýystyryldy.