Batys Qazaqstanda bir kúnde eki adam sýǵa ketti
ORAL. QazAqparat – Batys Qazaqstan oblysynda bir kúnde eki adam sýǵa ketti, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, 20 shilde kúni saǵat 15.00-de Tasqala aýdany Tasqala aýylynda 2008 jylǵy jasóspirim Derkól ózenine batyp ketti.
Ol shomylýǵa jabdyqtalmaǵan jerde sýǵa túsken. Balanyń denesin qutqarýshylar (4 qyzmetker, 1 júzý quraly, 1 tehnıka) saǵat 17.40-ta alyp shyqty.
Taǵy bir oqıǵa 20 shilde kúni Oralǵa qarasty Derkól aýylynda boldy. 1960 jylǵy er adam saǵat 20.30-da belgisiz jaǵdaıda Derkól ózenine batyp ketken. Onyń múrdesin qutqarýshylar (4 qyzmetker, 1 tehnıka) saǵat 21.20-da sýdan shyǵardy.
Eske sala keteıik, budan buryn Batys Qazaqstanda taǵy úsh adamnyń sýǵa ketkenin jazǵan bolatynbyz.
