Batys Qazaqstanda bir kúnde 2 medqyzmetkerden koronavırýs tabylǵan
ORAL. QazAqparat – Batys Qazaqstan oblysynda 359 adam karantındik statsıonarda jatyr, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetinen alynǵan málimetke qaraǵanda, qazirgi tańda 113 adam oblystyq juqpaly aýrýlar aýrýhanasynda emdelýde.
Sondaı-aq 20 adam provızorlyq statsıonarda jatsa, 1478 adam úıden baqylanýda.
Búgingi málimet boıynsha, oblysta 6 naýqas tirkelse, sonyń ekeýi – Reseı Federatsııasynda vahtalyq ádispen jumys isteıtin Túrkistan oblysy men Shymkent qalasynyń 23 jáne 24 jastaǵy turǵyndary. Olar «Syrym» beketinen ótkennen keıin karantındik statsıonarǵa jatqyzylyp, zerhanalyq synama alynǵannan keıin anyqtalǵan.
Sonymen qatar 2 kishi medıtsına qyzmetkeri koronavırýs juqtyrsa, taǵy ekeýi – statsıonar qyzmetkerleri. Olar buryn aýyrǵandarmen qarym-qatynasta bolǵan.
Osylaısha BQO-da syrqattanǵandar sany 122-ge jetse, sonyń jeteýi jazylyp shyqty. Aýyrǵandardyń ishinde 12-si – medıtsına qyzmetkerleri.
Eske sala keteıik, budan buryn Oralda taǵy bir turǵynnyń emdelip shyqqanyn, bir adamnyń jaǵdaıy aýyr ekenin jazǵan bolatynbyz.
