Batys Qazaqstanda bir kúnde 2 adam sýǵa ketti
ORAL. QazAqparat – Batys Qazaqstan oblysynda bir kúnde eki adam sýǵa ketti , dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa 24 shilde kúni oryn aldy.
Báıterek aýdany Peremetnyı aýyly mańynda saǵat 14.20-da Derkól ózeninen 1967 jylǵy er adamnyń denesin jergilikti turǵyndar shyǵaryp aldy. Ol sýǵa shomylýǵa tyıym salynǵan jerden túsip, belgisiz jaǵdaıda batyp ketken. Turǵyndardyń aıtýynsha, marqum mas kúıinde bolǵan.
Sot-medıtsınalyq saraptama qorytyndysy keıin belgili bolmaq.
Keshe sondaı-aq saǵat 16.40-tan Oral qalasynda Ýchýjnyı zaton mańynda Jaıyq ózenine batyp ketken 2001 jylǵy jigittiń denesin qutqarýshylar (9 adam, 2 júzý quraly) izdestirdi. Ol da shomylýǵa tyıym salynǵan jerden túsken.
Qazirgi kezde izdestirý jumystary jalǵasýda.
Osylaısha óńirde bıyl sýǵa ketkender sany 27-ge jetti, sonyń 8-i – balalar.
Eske sala keteıik, budan buryn Oralda áıel tik jardan qulap ketken bolatyn.
