Batys Qazaqstanda bir aptada jedel járdemge 6 myńǵa jýyq qońyraý shalyndy

ORAL. QazAqparat - Batys Qazaqstan oblysynda sońǵy aptada jedel járdem stansasyna 5950 qońyraý shalynyp, sonyń 773-i nemese 12,9 paıyzy kovıdke baılanysty boldy, dep habarlaıdy QazAqparat tilshisi.

BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń kórsetkishteri boıynsha 122 adam statsıonarǵa jatqyzyldy.

Ótken táýlikte 912 shaqyrtýdyń 103-i koronavırýsqa qatysty bolyp, 23 adam aýrýhanaǵa tústi.

A.Qalıbekovtiń sózine qaraǵanda, qazirgi kezde 791 naýqas ambýlatorııalyq em alyp jatsa, 75 paıyzynyń aýrýy jeńil ótýde. 6 paıyzy ortasha halde, 19 paıyzy - sımptomy joqtar.

Sondaı-aq óńirde 931 tósektik 16 ınfektsııalyq statsıonarda 249 naýqas (26,7 paıyzǵa tolǵan) em alýda. Sonyń ishinde 88 tósektik jansaqtaý bólimshesinde 19 patsıent (21,6 paıyz) jatyr. Bulardyń 12-si júrek-qan tamyrlary aýrýlaryna, tórteýi qant dıabetine shaldyqqan.

«Oblysta «Spýtnık V», «QazVac», «Vero Cell» vaktsınalary jetkilikti. Kúni búginge deıin 232 587 adam vaktsınanyń birinshi, 210 681-i ekinshi komponentimen egildi. Óńirde aýrý juqtyrý sońǵy eki aptada 14,4 paıyzǵa azaıǵanymen, bul indet ókpeni tez zaqymdaıdy. Ásirese, sozylmaly syrqaty, artyq salmaǵy bar adamdar úshin asa qaýipti. Sondyqtan ýaqyt ótkizbeı, ekpe alý kerek», dedi A.Qalıbekov.

Pandemııa bastalǵannan beri barlyǵy 38 542 naýqas tirkelip, sonyń 81,7 paıyzy (31 504) jazylyp shyqty. 800-i, bıyl 631 adam indetten qaıtys boldy.

Eske sala keteıik, budan buryn BQO-da qazan aıynda 1 myńnan astam adamnyń koronavırýs juqtyrǵanyn jazǵan bolatynbyz.

Sondaı-aq 230-ǵa jýyq oqýshydan koronavırýs anyqtaldy.