Batys Qazaqstanda bilimdiler dodasynda óńir jastary synǵa tústi

ORAL. QazAqparat – Oralda búgin «Ǵasyr» jastar qoǵamdyq birlestiginiń uıymdastyrýymen «Bilimdiler dodasy» zııatkerlik oıyny bastaldy. Jáńgir han atyndaǵy Batys Qazaqstan agrarlyq-tehnıkalyq ýnıversıtetinde ótip jatqan is-sharaǵa óńirdegi úzdik jastar komandalary qatysyp jatyr, dep habarlaıdy QazAqparat tilshisi.

Batys Qazaqstan oblystyq qoǵamdyq damý basqarmasynyń qoldaýymen bastaý alǵan bul joba oblys jastarynyń shyǵarmashylyǵyn damytýǵa baǵyttalyp otyr.

Birneshe kezeń boıynsha ótetin zııatkerlik oıynda túrli salada eńbek etip, úzdikter qatarynan kórinip júrgen jastardyń bilim deńgeıi synalyp, aqyl-oı deńgeıleri tarazyǵa túspek.

Oıynnyń ashylý saltanatynda sóz alǵan Batys Qazaqstan oblysynyń qoǵamdyq damý basqarmasy basshysynyń orynbasary Qalaýbek Temirov atalmysh is-sharanyń mán-mańyzyna toqtalyp, jastar saıasaty salasy – memlekettiń ajyramas bóligi ekenin atap ótti.

Sonymen qatar qatysýshy komandalarǵa sáttilik tiledi.

«Óner men bilim synǵa túsip, shyǵarmashylyq shyńdalatyn bul joba Aq Jaıyq óńiriniń ozyq jastary arasyndaǵy dostyq qarym-qatynasty nyǵaıtýǵa septigin tıgizedi dep úmittenemiz. Jobamyzdyń maqsaty – jastar arasynda ǵylym men bilimdi, qazaq halqynyń tól mádenıeti men ónerin, salt-dástúrin dáripteý, qatysýshylardyń boıyndaǵy zııatkerlik daǵdylaryn, parasattylyǵyn osy baıqaý arqyly kórsetý», - deıdi uıymdastyrýshylar.

Zııatkerlik oıynǵa qatysatyn 10 komandaǵa oıynnyń erejesi men talaptary túsindirildi. «Júzden – júırik, myńnan – tulpar» atanǵan komandalar jartylaı fınalda jáne fınaldyq kezeńde óner kórsetetin bolady.

Zııatkerlik oıyn jyl sońyna deıin jalǵasady.