Batys Qazaqstanda bıler keńesi qurylýda
ORAL. QazAqparat - Batys Qazaqstan oblysynda bıler keńesi qurylýda. Bul týraly oblystyq sotta ótken jıynda belgili boldy, dep habarlaıdy QazAqparat tilshisi.
Sharany ashqan oblystyq sottyń azamattyq ister jónindegi alqa tóraǵasy Qaırat Adranov Qazaqstannyń sot júıesinde qoldanylyp júrgen daýlardy sheshý kezindegi tatýlastyrý rásimi erteden kele jatqan bıler sotyna uqsas ekendigin atap ótti. Qazir munyń medıatsııa dep atalatyny málim.
Kóshpeli qazaq qoǵamyndaǵy bıler keńesi memlekettik mańyzdy máselelerdi sheshken organdardyń biri bolǵandyǵy belgili. Bıler tek jeke daýlar boıynsha sheshim shyǵarýmen qatar mámileger, basqarýshy, aıyptaýshy men qorǵaýshy retinde de ózderi shyǵaratyn sheshimder arqyly ádildik ornatty. Oǵan halyq ta kúmán keltirmedi.
Oblystyq sottyń sýdıasy Esenbaı Boranbaev jurtshylyq ádildik izdep, aldyna baratyn bılerdiń jeke basynyń bedeli bıik bolýy kerektigine toqtaldy.
«Uly ǵalym Ahmet Baıtursynovtyń «Ádil bılerdiń qolyndaǵy bılik qazaqtyń neshe túrli dertin jazatyn jaqsy dári edi» dep aıtqany bar. Endeshe, sol ıgi dástúrdi jańǵyrtqannan eshkim utylmasy anyq», dedi E.Boranbaev.
Bıler keńesin qurý jumysy Bókeı ordasy aýdanynda bastalyp ta ketti.
Jıyn qorytyndysy boıynsha oblystyq sot tóraǵasy Bek Ámetov barlyq aýdandyq sottarǵa aýyldyń syıly aqsaqaldarynan turatyn bıler keńesterin qurýdy tapsyrdy.
Sonymen qatar Qaırat Adranov «Medıatsııa týraly» QR Zańyn basshylyqqa ala otyryp, ár aýdanda bılerdi saılaýdyń ortaq erejelerin ázirleý jáne olardy deldal retinde usyný máselesin kóterdi.
Oblystyq sottyń sýdıasy Esenbaı Boranbaev óńirdegi bıler keńesin qurý jónindegi úılestirýshi bolyp bekitildi.
