Batys Qazaqstanda «Beseýdiń haty» eskertkish taqtasy ornatyldy

ORAL. QazAqparat – Saıası qýǵyn-súrgin jáne asharshylyq qurbandaryn eske alý kúnine oraı Kaztalov aýdany ortalyǵy Kaztalov aýylynda «Beseýdiń haty» eskertkish taqtasy ashyldy, dep habarlaıdy QazAqparat tilshisi.

Eskertkish taqtanyń ashylý rásimine qatysqan aýdan ákimi Aslanbek Sarqulovtyń málim etkenindeı, 2020 jyly Memleket basshysy Qasym-Jomart Toqaevtyń saıası qýǵyn-súrgin qurbandaryn tolyq aqtaý jóninde tapsyrmasyna sáıkes óńirlik komıssııalar qurylǵan.

«Óńirlik komıssııa jumysyna Kaztalov aýdanynyń azamattary da óz úlesterin qosty. Bul baǵytta arnaıy jınaqtar basylyp shyqty. Osy arqyly tarıhtyń jańa bir tynysy ashylyp, óshkenimiz janyp, ólgenimiz tirilgendeı boldy. Saıası qýǵyn-súrgin men asharshylyq taqyrybyn qozǵaǵan kezde «Beseýdiń haty» oıǵa oralary anyq. Hatta Kaztalov aýdanynan túlep ushqan memleket jáne qoǵam qaıratkeri Mansur Ǵataýlınniń de qoltańbasy bolýy – biz úshin maqtanysh. Búgin, mine, ólke tarıhyn túgendep, arystaryn joqtaǵan Serik Jumaǵalıev, Ýálıolla Ábishev syndy azamattarymyzdyń bastamasymen, halyqtyń qoldaýymen «Beseýdiń haty» eskertkish taqtasy ashylyp otyr. Atalǵan azamattarǵa, qoldaý kórsetken jandardyń bárine shynaıy rızashylyǵymdy bildiremin», - dedi A.Sarqulov.

Aýdan ortalyǵyndaǵy «Jeńis» saıabaǵynda boı kótergen eskertkishtiń ashylý barysynda S.Sadyqov atyndaǵy aýdandyq mádenı-demalys ortalyǵy janyndaǵy halyqtyq teatry «Beseýdiń haty» qoıylymy arqyly hat avtorlary Ǵabıt Músirepov, Embergen Altynbekov, Mansur Ǵataýlın, Mutash Dáýletqalıev, Qadyr Qýanyshevtiń erligin kópshilik nazaryna usyndy.

Eńbek ardageri Ýálıolla Ábishevtiń aıtýynsha, «Beseýdiń haty» asharshylyqqa baılanysty jazylǵany málim.

Ony Qazaqstan halyq jazýshysy Sherhan Murtaza tarıhı dramasyna arqaý etti.

Sondaı-aq kaztalovtyq qalamger, Qazaqstannyń qurmetti jýrnalısi Serik Jumaǵalıev arnaıy maqala jazdy.

Eskertkish taqta akademık, sýretshi Maqsut Ismaǵulovtyń jobasy boıynsha jasaldy. Bul klassıkalyq turǵydan qaraǵanda, aq pen qaranyń úılesimdiligin baıqatady.

Al hat avtorlarynyń esimi jazylǵan taqta bir jaǵy jerde, bir jaǵy kókke umtylǵan qustyń qanaty ispettes.

Dálirek aıtqanda, zobalań jyldardy basynan ótkerip, jarqyn bolashaqqa umtylǵan halyqtyń armany dese bolady.

Eske sala keteıik, budan buryn BQO-da saıası qýǵyn-súrgin qurbandaryn aqtaý jaıly jańa kitaptar tanystyrylǵanyn jazǵan bolatynbyz.