Batys Qazaqstanda bes nysannyń qurylysy kesheýildep otyr
ORAL. QazAqparat – Batys Qazaqstan oblysynda bes nysannyń qurylysy kesheýildep otyr, dep habarlaıdy QazAqparat tilshisi.
Oblys ákimi Ǵalı Esqalıevtiń tóraǵalyǵymen ótken keńeste aıtylǵanyndaı, bıylǵy sáýirden beri óńirde qurylys barysyna «Bıtrıks 24» aqparattyq júıesi arqyly
monıtorıng júrgizilip keledi.
Oǵan kópqabatty turǵyn úıler, áleýmettik nysandar, avtojoldar qurylysy, ınjenerlik jelilerdi tartý syndy baǵyttar boıynsha 693 joba engizilgen.
Kúni búgin 241 joba máresine jetse, 187-si qarjy joqtyqtan toqtatylǵan. 265-inde jumys júrgizilýde.
Atalǵan júıe málimetine sáıkes 5 nysan bekitilgen kesteden keıinge qalǵan.
Bes nysannyń biri Oral qalasynda. Zachagan kentinde jańadan salynyp jatqan 9 kópqabatty úıge elektr, gaz jáne jylý jelilerin tartý, jylý qazandyǵyn salý jumysyn merdiger 29 qarashada aıaqtaýy tıis edi.
Qala ákimi Abat Shynybekov osyǵan baılanysty qazandyqta ishinara jumystar qalǵanyn, nysannyń jeltoqsan aıynyń sońyna deıin aıaqtalatynyn málimdedi.
Terekti aýdanynda úsh nysannyń qurylysy, atap aıtqanda, Aqsýat aýylynda orta mektep jáne Fedorovta Rabochaıa men Molodejnaıa kósheleriniń jolyn kúrdeli jóndeý ýaqtyly
bitpegen.
Aýdan ákimi Arman Óteǵulovtyń sózine qaraǵanda, jol salýshy «Razak» JShS-men kelisimsharttyń kúshi joıylyp, merdigerdi memlekettik satyp alýdyń josyqsyz
qatysýshysy dep taný týraly sotqa talap-aryz berilgen.
Aqsýat orta mektebin kúrdeli jóndeýdiń aıaqtalmaýyna qolaısyz aýa raıy áser etkendikten, merdiger «Altım» JShS jyldyń sońyna deıin merzimin uzartýdy suraǵan.
Sol sekildi Qaztalov aýdandyq aýrýhanasyn kúrdeli jóndeý jumysy da (merdiger «Jıenbaı» JShS) bitpeı otyr.
Oblystyq densaýlyq saqtaý basqarmasy basshysynyń orynbasary Gúlnár Ábdirahmanovanyń málim etkenindeı, bul mekemeni de josyqsyz qatysýshy dep taný týraly sotqa talap-aryz berilgen.
Oblystyq qurylys basqarmasynyń basshysy Álibek Antazıevtiń túsindirýinshe, bastapqyda qurylys jobasyna qatysty kidirýshilik bolyp, merdiger mekeme ýaqytty ótkizip alǵan. «Jıenbaı» JShS kóptegen jobalardy qolǵa alyp, sonyń ishinde Tasqala aýdanynda jumys isteýde. Qazirgi kezde jumysshylardy basqa jobalardan bosatyp, Qaztalovqa jibergen. Bul nysannyń jumysy da jyl sońynda márege jetpek.
Oblys ákimi Ǵ.Esqalıev buǵan qanaǵat etpeı, «Jıenbaı» JShS basshysymen ózi kezdesetinin, qurylys nysandarynyń ýaqtyly aıaqtalýy qatań baqylaýda bolatynyn jetkizdi.
