Batys Qazaqstanda bes mektep, bir balabaqsha karantınge jabyldy

ORAL. QazAqparat – Batys Qazaqstan oblysynda tórtinshi toqsanda 1 sáýirden bastap 446 oqýshydan koronavırýs anyqtaldy, olardyń 235-i dástúrli sıpatta, 211-i qashyqtan oqıdy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, osy ýaqytta 219 muǵalimnen indet tabyldy.

Olardyń 207-si dástúrli sıpatta, 12-si qashyqtan sabaq beredi.

Oqý jyly bastalǵannan beri barlyǵy 1079 oqýshy (577-si dástúrli sıpatta, 502-si qashyqtan bilim alady) syrqattandy.

Departament basshysynyń aıtýynsha, qazirgi kezde 5 mektep, 1 balabaqsha, sonymen qatar 30 mekteptegi 59 synyp, 9 balabaqshada 9 top, 1 JOO-da 1 top karantınge jabyldy.

Mamyr aıynda oblys boıynsha 1551, sońǵy táýlikte 123 adamda indet tirkeldi.

Osy aıda 29465 PTR test zertteýleri (kúnine orta eseppen 2266) júrgizildi.

Monıtorıngtik toptar mamyrda 109 reıd júrgizip, 487 nysandy qamtydy. 1 nysanda karantın tártibin buzýshylyq anyqtaldy. 17 hattama toltyrylyp, 743835 teńge aıyppul salyndy.

«Ashyq» qosymshasymen oblys boıynsha barlyǵy 245 nysan jumys isteıdi. Kovıdpen aýyryp júrgen, sondaı-aq indet juqtyrǵandarmen qarym-qatynastaǵy, ıaǵnı úılerinde oqshaýlanýǵa tıisti adamdardyń osyndaı nysandarǵa kelý derekteri belgili bolýda. Atap aıtqanda, Oralda qyzyl tústi mártebesi bar 20, sary tústi 25, Aqsaı qalasynda qyzyl tústi mártebesi bar 2, sary tústi 5 adamnyń atalmysh nysandarǵa kirmek bolǵany anyqtaldy», dedi M.Aryspaev.

Eske sala keteıik, budan buryn BQO-da koronavırýstan qaıtys bolǵandar boıynsha málimet jarııalanǵanyn jazǵan edik.