Batys Qazaqstanda baý-baqsha ósirýshiler qatary kóbeıip keledi

Soǵan sáıkes egilgen daqyl kólemi ósken. Aıtalyq, oblys boıynsha kartop 4040 gektarǵa (2011 jyly 3844 ga), kókónis 3802 gektarǵa (2011 jyly 3718 ga), baqsha daqyldary 1606 gektarǵa (2011 jyly 1568 ga) otyrǵyzyldy. Byltyr baý-baqsha ósirýmen 297 sharýashylyq aınalyssa, bıyl olardyń qataryna bes sharýashylyq qosylǵan. Búginde oblysta 135 agroqurylym kartop ósirýmen aınalysady. Ótken jyly olar 923 gektar jerge,  bıyl 1210 gektarǵa kartop otyrǵyzdy.

Sonymen qatar baqsha ósirýshiler arasynda tamshylatyp sýarý ádisin qoldanýǵa degen umtylys baıqalady. Ótken jylmen salystyrǵanda tamshylatyp sýarý júıesin qoldanatyn alqap 47 gektarǵa ulǵaıǵan. Terekti aýdanynyń «OralAgroServıs» JShS tamshylatyp sýarý júıesin qoldanyp 100 ga jerge pııaz otyrǵyzyp, mol ónim aldy.  Osy júıeni qoldaný arqyly Bórli aýdanynyń «Ovoşevod», «Nur», Zelenov aýdanynyń «Desýmbaev» sharýashylyqtary oń nátıjege jetti.

Oblystyq aýyl sharýashylyǵy basqarmasynan túsken málimetke qaraǵanda, oblys turǵyndarynyń kartopqa degen suranysy 42,7 myń tonnany, sábizge 11 myń tonnany, pııazǵa 11,6 myń tonnany, qyryqqabatqa 11,2 myń tonnany, baqsha daqyldaryna 14,8 myń tonnany quraıdy.

Óńirde 135 agroqurylym kartop ósiredi. Ótken jyly kartop ósiriletin alqap 923 gektardy qurasa, bıyl onyń kólemi 1210 gektarǵa jetti. Zelenov aýdanynyń «Dýsýpov», «Predko», «Avgýst», Terekti aýdanynyń «Balakırev» sharýshalyqtary kartop ósirýge mamandanǵan iri sharýashylyqtar sanalady.

Mamandar bir adam jylyna kartoptyń 70 kelisin, kókónis pen baqsha daqyldarynyń 100 kelisin tutynady dese, búginde Batys Qazaqstanda bir adamǵa kartoptyń 89 kelisi, kókónistiń, baqsha ónimderiniń 117 kelisi óndiriledi.

Oblystyq aýyl sharýashylyǵy basqarmasy bastyǵynyń orynbasary Ismadııar Jumabaevtyń aıtýynsha, turǵyndardyń qajettiligi negizinen jergilikti kókónis  jáne baqsha ónimderi esebinen qamtamasyz etiledi. Ras, erte pisetin jemis-jıdektiń jetkiliksiz kólemi ǵana syrttan ákelinedi. Azyq-túlik beldeýin qurý, qaıta óńdeý óndirisin salý jáne modernızatsııalaý jumystarynyń nátıjesinde ishki naryqty qamtamasyz etý múmkinshiligi týdy. Negizgi azyq-túlik tizimine qosylǵan 64 azyq-túlik túriniń 30-y, Úkimet qaýlysymen bekitilgen áleýmettik mańyzy bar 17 azyq-túlik taýarlarynyń 12-si oblysta óndiriledi.