Batys Qazaqstanda bankten 120 mln teńge jymqyrý boıynsha eki adam kúdikke ilindi

ORAL. QazAqparat - Batys Qazaqstan oblysynda bankten 120 mln-daı teńge jymqyrý deregi boıynsha eki adam kúdikke ilindi, dep habarlaıdy QazAqparat tilshisi.

BQO polıtsııa departamenti baspasóz qyzmetinen túsken málimetke qaraǵanda, 26 mamyr kúni «Bank RBK» AQ ámbebap qor bankiniń aǵa menedjeri Bórli aýdany polıtsııa bólimine júgingen.

Ol tekserý barysynda 25 mamyrda bankten 67 mln teńge, 34 500 eýro jáne 80 myń AQSh dollary urlanǵanyn habarlaǵan.

«Qazirgi kezde bul qylmysqa qatysty eki adamǵa aıyp taǵyldy. Onyń bireýi QR Qylmystyq is júrgizý kodeksiniń 128-baby tártibimen ustaldy. Atalǵan derek QR QK 190-baby 4-bóligi 2-tarmaǵyna (alaıaqtyq) sáıkes sotqa deıingi tergep-tekserýdiń biryńǵaı tiziliminde tirkeldi», dep habarlady vedomstvodan.