Batys Qazaqstanda balyq aýlaýǵa barǵan er adam sýǵa ketti
ORAL. QazAqparat - Batys Qazaqstan oblysynda balyq aýlaýǵa barǵan er adam sýǵa ketti, dep habarlaıdy QazAqparat tilshisi.
Qaıǵyly oqıǵa Aqjaıyq aýdanynda búgin tańerteń oryn aldy.
Aýdandyq TJ bóliminiń bastyǵy, azamattyq qorǵaý maıory Temirhan Qajyǵalıevtiń aıtýynsha, Oraldan Kırov sý qoımasyna balyq aýlaımyn dep kelgen 1960 jylǵy azamat qaýipsizdikti saqtamaǵandyqtan, sýǵa ketken.
Bıyl osymen Aqjaıyq aýdanynda tórt adam sýǵa ketip otyr. Budan buryn 21 sáýir kúni Taıpaq aýyldyq okrýgine qarasty Shabdarjap aýyly tusynda 1977 jáne 1983 jylǵy eki er adam Jaıyq ózenine batyp ketken. Olar da balyq aýlaý kezinde qaýipsizdik erejelerin saqtamaǵan.
Sonymen qatar 12 mamyr kúni Taıpaq aýylynda 2008 jylǵy jasóspirim Jaıyq ózenine sýǵa túsý kezinde batyp ketti. Onyń denesin 13 mamyr kúni turǵyndar alyp shyqty.
Eske sala keteıik, budan buryn Oralda joǵalyp ketken 83 jasar qarııanyń múrdesi tabylǵanyn jazǵan bolatynbyz.
