Batys Qazaqstanda «Azattyqtyń altyn kúni» atty aqyndar aıtysy márege jetti
ORAL. QazAqparat - Terekti aýdany ortalyǵy Fedorov aýylynda «Rýhanı jańǵyrý» baǵdarlamasy aıasynda Alashorda úkimetiniń 100 jyldyǵyna arnalǵan «Azattyqtyń altyn kúni» atty oblystyq aqyndar aıtysy márege jetti, dep habarlaıdy «QazAqparat» tilshisi.
Dodaǵa barlyǵy on segiz aqyn qatysyp, azattyqty ańsaǵan Alash qaıratkerleriniń atqarǵan qyzmeti men tarıhtaǵy orny, qazirgi rýhanı jańǵyrýǵa baılanysty keleli máselelerdi jyrǵa qosty. Olardyń arasynda respýblıkalyq saıystarǵa qosylyp, tanylyp qalǵandary, sonymen qatar mektep qabyrǵasynda júrgender de boldy. 
Aıtys qorytyndysynda qazylar alqasynyń sheshimimen Aqjaıyq aýdanynyń túlegi, qazir Oralda turatyn Aınabek Bısenǵalıev bas júldeni jeńip aldy. Sondaı-aq Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń magıstranty Alshynbek Muqanǵalıev birinshi, terektilik Eldar Iqsanov pen bórlilik Jarqynbek Shyntaev ekinshi, qaratóbelik Raıymbek Ótepov, syrymdyq Baýyrjan Shırmedınuly jáne aqjaıyqtyq Bekbolat Qalenov úshinshi orynǵa ıe boldy.
Aıta keteıik, Terekti aýdany sońǵy jyldary ulttyq qundylyqtar men dástúrli ónerdi nasıhattaý maqsatynda aıtysty turaqty uıymdastyryp keledi.
