Batys Qazaqstanda azamat soǵysy kezinen qalǵan snarıadtar tabyldy
ORAL. QazAqparat – Batys Qazaqstan oblysynda azamat soǵysy kezinen qalǵan snarıadtar tabyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, birinshi oqıǵa 26 sáýir kúni Báıterek aýdany Jańatań aýyly tusynda boldy.
Malshy bolyp jumys jasaıtyn 1983 jylǵy turǵyn aýyldan 4-5 shaqyrym qashyqtyqta temir izdep, jer qazyp júrip, uzyndyǵy 300 mm, dıametri 75 mm metall snarıad taýyp alǵan.
Oqıǵa ornyna saperlar dereý jetip, snarıadty joıdy. Mamandardyń saraptamasyna sáıkes snarıad azamat soǵysy jyldarynan beri jatqan bolyp shyqty.
Sondaı-aq 27 sáýir kúni shamamen saǵat 11.50-de Báıterek aýdany Darııan aýylynyń shetinde 1988 jylǵy turǵyn uzyndyǵy 350 mm, dıametri 76 mm artıllerııalyq snarıad taýyp alǵan. Aldyn ala málimetke qaraǵanda, joıylǵan bul snarıad ta azamat soǵysy kezinen qalǵan.
Eske sala keteıik, budan buryn Oralda aýrýhanadan shyǵyp, joǵalyp ketken 65 jastaǵy er adamnyń múrdesi tabylǵanyn jazǵan bolatynbyz.
