Batys Qazaqstanda aımaqtyq Qadyr oqýlary márege jetti
ORAL. QazAqparat - Qazaqtyń uly aqyny, Qazaqstan halyq jazýshysy, Memlekettik syılyqtyń ıegeri Qadyr Myrza Álıdiń týǵan jeri - Syrym aýdanynda І aımaqtyq Qadyr oqýlary márege jetti, dep habarlaıdy «QazAqparat» tilshisi.
Syrym aýdany ákimdiginen túsken málimetke qaraǵanda, aımaqtyq deńgeıde alǵash ret uıymdastyrylǵan baıqaýǵa Mańǵystaý, Atyraý, Aqtóbe jáne Batys Qazaqstan oblystarynan qyryqqa jýyq úmitker qatysyp, baq synady.
«Sózdiń bári qudiretti...» atty Qadyr Myrza Álıdiń óleńderin jatqa oqý baǵyty boıynsha Syrym aýdany Q.Myrzalıev atyndaǵy orta mekteptiń 9-synyp oqýshysy Asylgúl Shaýjan bas júldeni jeńip aldy. Al «Keıbir jyrym dán ushyryp qyrmanda, Keıbir jyrym baqtashy bop júr mańda» atty Qadyr aqynnyń sózderine jazylǵan ánderdi oryndaý boıynsha Aqtóbe qalasyndaǵy №32 mektep-gımnazııasynyń 10-synyp oqýshysy Aıhat Edige jeńimpaz atandy. «Qýyp shyǵar qyzyl sózdi oı keıin...» atty Qadyr Myrza Álıge arnalǵan óz týyndylaryn oqý boıynsha Atyraý oblysy Inder aýdanyndaǵy Mahambet atyndaǵy orta mekteptiń 9-synyp oqýshysy Dılnaz Borısova bas júldege ıe boldy.
Baıqaýdyń eń jas qatysýshysy retinde Tasqala aýdany Q.Sátbaev atyndaǵy orta mekteptiń 6-synyp oqýshysy Qasymjomartáli Ǵazezge Syrym aýdany ákimdiginiń arnaıy syılyǵy - noýtbýk tabys etildi.
Saıys qorytyndysynda quttyqtaý sóz sóılegen aýdan ákimi Abat Shynybekov aqynnyń jary Saltanat Myrzalıevaǵa rızashylyǵyn bildirip, «Jas sýretshi» úıirmesiniń jetekshisi Musa Sultanǵalıevtiń maıly boıaýmen salǵan Qadyrdyń portretin syıǵa tartty.
