Batys Qazaqstanda avtokólikten granata tabyldy

ORAL. QazAqparat - Batys Qazaqstan oblysynda avtokólikten granata tabyldy, dep habarlaıdy QazAqparat tilshisi.

BQO polıtsııa departamenti baspasóz qyzmetinen túsken málimetke qaraǵanda, oqıǵa 8 qańtar kúni shamamen saǵat 05.20-da boldy. Terekti aýdany Podstepnyı aýylynda ornatylǵan blokposta armıan nómirli «Toıota Alfard» avtokóligi toqtatyldy.

Avtokólikte júrgizýshiden basqa eki er adam, emizetin balasy bar áıel bolǵan. Júrgizýshi polıtsııa qyzmetkerleriniń júksalǵyshty ashý jónindegi talabynan salondaǵy balaǵa qaýipti dep bas tartqan. Jolaýshylardy qaraǵan kezde er adamnyń bireýinen pyshaq tabylǵan. Keıin olardy Abaı polıtsııa bólimine jetkizý kezinde júrgizýshi boı tasalaýǵa tyrysqan.

Sóıtip taǵy kúdik týdyrǵan. Júksalǵyshty qaraý kezinde odan granata, 12 kalıbrli tegis uńǵyly myltyqtyń oq-dárisi, 50-den astam uıaly telefon, 6 planshet, 23 birlik smart-saǵat, basqa da gadjetter men aksessýarlar, kıim salynǵan birneshe sómke tabyldy. Qazirgi kezde avtokólik arnaıy turaqqa qoıyldy. Atalǵan oqıǵa boıynsha sotqa deıingi tergeý amaldary júrgizilýde.

Eske sala keteıik, budan buryn Oralda túngi ýaqytta barda júrgender ustalǵanyn jazǵan bolatynbyz.