Batys Qazaqstanda avtokólik aýdarylyp, eki jasóspirim aýrýhanaǵa jetkizildi
BQO polıtsııa departamentiniń baspasóz qyzmeti málim etkenindeı, oqıǵa 30 tamyz kúni Aqjaıyq aýdany aýmaǵynda boldy.
Saǵat 00.16-da Chapaev-Jalpaqtal kúre joly boıynda 1990 jylǵy júrgizýshi «Toıota Ipsom» avtokóliginiń rýline ıe bola almaı, aýdarylyp qalýyna jol bergen.
Sonyń saldarynan 16 jáne 14 jasar eki jasóspirim Aqjaıyq aýdandyq ortalyq aýrýhanasyna jetkizildi. Dárigerler qaraǵannan keıin ekeýi de aýrýhanaǵa jatqyzyldy.
Avtokólik arnaıy turaqqa qoıyldy.
Qazirgi kezde QR QK 345-baby 1-bóligine sáıkes sotqa deıingi tergeý amaldary júrgizilýde. BQO densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, eki jasóspirim de dene jaraqattaryn alǵan. Jabyq bas-mı jaraqatyna qosa mıyna zaqym kelgen. Jaǵdaılary aýyr, ekeýi de jansaqtaý bóliminde.
Polıtsııa departamentiniń málimetine qaraǵanda, jyl basynan beri jol-kólik oqıǵalary saldarynan 3 bala qaıtys bolyp, 47-si túrli jaraqat aldy.
Jańa oqý jylyna oraı óńirde «Abaılańyz, balalar!» jedel aldyn alý is-sharalary (23-31 tamyz – daıyndyq, 1-9 qyrkúıek – negizgi kezeń) júrgizilýde.
Eske sala keteıik, budan buryn BQO-da qalyńdyq alyp qashqandardyń jylqyǵa soǵylyp, 4 adamnyń jansaqtaý bólimine túskenin jazǵan bolatynbyz.