Batys Qazaqstanda avtokólik aýdarylyp, 31 jastaǵy jolaýshy mert boldy
ORAL. QazAqparat - Batys Qazaqstan oblysynda avtokólik aýdarylyp, 31 jastaǵy azamat mert boldy, dep habarlaıdy QazAqparat tilshisi.
BQO polıtsııa departamenti baspasóz qyzmetinen túsken málimetke qaraǵanda, oqıǵa 30 maýsym kúni Aqjaıyq aýdany aýmaǵynda boldy.
Saǵat 06.00-de Atyraý-Oral jolynyń 271-shaqyrymynda 30 jastaǵy júrgizýshi «VAZ-21010» avtokóliginiń rýline ıe bola almaı, aýdarylýyna jol bergen. Ol medıtsınalyq qorytyndyǵa sáıkes mas kúıinde bolǵan.
Jol apaty saldarynan 1990 jylǵy er adam jedel járdem kóliginde kóz jumdy. Múrde sot-medıtsınalyq saraptamaǵa jiberildi. 1996 jylǵy qyz Aqjaıyq aýdandyq ortalyq aýrýhanasyna jatqyzyldy.
Avtokólik arnaıy turaqqa qoıylyp, kúdikti ýaqytsha ustaý ızolıatoryna qamaldy.
Qazirgi kezde QR QK 345-baby 3-bóligine sáıkes sotqa deıingi tergeý amaldary júrgizilýde.
Eske sala keteıik, budan buryn Aqsaı qalasynda 55 jastaǵy er adamdy óltirgen kúdikti ustalǵanyn jazǵan bolatynbyz.
