Batys Qazaqstanda aýyldasyn óltirgen turǵyn 13 jylǵa sottaldy
ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda N.Amanǵalıevke qatysty úkim jarııalandy, dep habarlaıdy QazAqparat tilshisi.
Atalmysh sottan túsken málimetke qaraǵanda, is «TrueConf» mobıldik beınebaınalys júıesi arqyly qaraldy.
Sot talqysynda belgili bolǵanyndaı, N.Amanǵalıev 2019 jyly 9 jeltoqsanda saǵat 02.00 shamasynda Shyńǵyrlaý aýdany Shyńǵyrlaý aýyly Ǵ.Muratbaev kóshesi 22-mekenjaıynda ornalasqan J.Qanafınniń úıine qonaqqa barǵan.
Eki saǵattan keıin qonaqtar tarap, ústel basynda N.Amanǵalıev, J.Beketov, M.Súndetov, G.Muqashev jáne J.Qanafın qalyp, araq iship otyrǵan.
Sodan saǵat 05.20 shamasynda úı ıesi syrtqa shyǵyp ketkende, masaıǵan N.Amanǵalıev pen J.Beketov sózge kelgen. M.Súndetov pen G.Muqashev olardy sabyrǵa shaqyrǵan. Alaıda N.Amanǵalıev bolmashy nárseni syltaý etip, J.Beketovtiń keýde tusyna eki márte qasaqana pyshaq suqqan. Marqum sol jerde kóz jumǵan.
Sotta N.Amanǵalıev kinásin ishinara moıyndap, bolǵan oqıǵaǵa shyn ókinetinin, óltiremin degen oıy bolmaǵanyn, ózin-ózi qorǵaný maqsatynda pyshaq jumsaǵanyn aıtty.
Sýdıa Shara Zaınýllınanyń málim etkenindeı, N.Amanǵalıev QR QK 99-baby 1-bóligine (adam óltirý) sáıkes aıypty dep tanyldy. Onyń qylmysy asa aýyr qylmystar sanatyna jatady.
N.Amanǵalıev 13 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Jábirlenýshiniń azamattyq talap aryzy negizinde 7 mln teńge kólemindegi moraldyq zalal jáne materıaldyq shyǵyn ishinara qanaǵattandyryldy.
Sot úkimi zańdy kúshine engen joq.
Eske sala keteıik, budan buryn esikti qulyptaýdy umytqany úshin aǵasyn óltirgen turǵynnyń sottalǵanyn jazǵan bolatynbyz.
