Batys Qazaqstanda aýyl mektebine sý kirdi
Qaratóbe aýdanynyń ákimi Qadyrjan Súıeýǵalıevtiń aıtýynsha, oqıǵa 28 naýryz kúni tańmen Qoskól aýyldyq okrýgine qarasty Shalǵyn ortalaý mektebinde boldy.
Shalǵyn – Qoskólden 25, aýdan ortalyǵy Qaratóbeden 100 shaqyrym qashyqtyqta ornalasqan shaǵyn eldi meken. Munda 45 aýla, 196 turǵyn bar.
Aýdan basshysynyń sózine qaraǵanda, ortalaý mekteptiń bir ǵımaraty 1967, ekinshisi 1987 jyly salynǵan. Keıin aýyl turǵyndary óz kúshterimen ekinshi ǵımaratqa japsarlas qosymsha qurylys salǵan. Sońǵy kezde qardyń kúrt erýi ári jańbyr jaýýy saldarynan, irgetasy tómen boldy ma, osy qosymsha ǵımaratqa sý kirip, peshteri qulap, basqa da zaqym keldi.
Qumaıt jerde ornalasqandyqtan, buryn Shalǵynda mundaı oqıǵa bolyp kórmegen edi.
«Mektep ǵımaratyna keshe de qaýip tóndi. Degenmen TJ, jergilikti atqarýshy organdar jáne aýyl turǵyndarynyń jumylýy nátıjesinde tasqynǵa tosqaýyl qoıyldy. Atalmysh mektepte 37 shákirt bilim alady. Búgin olar basqa ǵımarattarda oqyp jatyr. Oqıǵaǵa baılanysty arnaıy komıssııa qurylyp, jumys istep jatyr», dedi QazAqparat tilshisine Q.Súıeýǵalıev.
Eske sala keteıik, budan buryn Qazaqstanda sý basý qaýpi bar 445 jol ýchaskesi bar ekenin jazǵan bolatynbyz.
