Batys Qazaqstanda aýyl ákiminiń ulyn óltirgen turǵyn sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynyń úkimimen Hamıt Abdýllın QR QK 99-baby 1-bólimine sáıkes aıypty dep tanylyp, 11 jylǵa bas bostandyǵynan aıyrý jazasyn qatań tártiptegi kolonııada óteýge sottaldy, dep habarlaıdy «QazAqparat» tilshisi.
Atalmysh sottyń tóraǵasy Qaırat Shalqarov qaraǵan is barysynda belgili bolǵanyndaı, H.Abdýllın Zelenov aýdany Krasnov aýyldyq okrýgi ákiminiń uly Anatolıı Shatalovpen bir synypta oqyǵan. Sol kúni ekeýi Shatalovtyń úıinde araq ishken. Sonyń barysynda sózge kelip, sońy tóbeleske ulasqan. Aqyry Abdýllın synyptasyn tunshyqtyryp óltirgen.
Sot úkimine sáıkes, H.Abdýllındi maskúnemdikten májbúrlep emdeý taǵaıyndaldy. Sonymen qatar ol jábirlenýshi tarapqa 2 mln. teńge kóleminde moraldyq zalaldy tóleýi tıis.
Sot úkimi zańdy kúshine engen joq.
Eske sala keteıik, 1993 jylǵy marqumnyń múrdesi Zelenov aýdany Pogodaev aýylyndaǵy óz úıinde ótken jylǵy 6 qarasha kúni tabylǵan bolatyn. Keıin jedel izdestirý sharalary barysynda 1993 jylǵy kúdikti de ustalǵan edi.
