Batys Qazaqstanda aýyl ákimderi halyq aldynda esep berýde
ORAL. QazAqparat - Batys Qazaqstan oblysynyń ákimi Altaı Kólginov óńirdiń 2017 jylǵy áleýmettik-ekonomıkalyq damýynyń qorytyndylary jóninde turǵyndar aldynda esep beredi, dep habarlaıdy «QazAqparat» tilshisi.
QR Prezıdentiniń «Ortalyq atqarýshy organdar basshylarynyń, ákimderdiń, ulttyq joǵary oqý oryndary rektorlarynyń halyqqa esep berý kezdesýlerin ótkizý týraly» Jarlyǵyna sáıkes óńir basshysynyń bıylǵy eseptik kezdesýi 16 aqpan kúni Oqýshylar jáne jastar saraıynda ótedi.
Osyǵan oraı qazirgi kezde Oral qalasy men aýdandarda arnaıy jáshikter ornatylyp, turǵyndardyń usynys-tilekteri, eskertpeleri jınaqtalýda. Sondaı-aq olar óz oılaryn kense@bko.gov.kz elektrondy poshtasyna joldaı alady.
Oblys ákimi apparaty uıymdastyrý-ınspektorlyq jumystary bóliminiń basshysy Jasulan Nurǵojınniń aıtýynsha, qazirgi kezde aýyl ákimderi esep berýde. 31 qańtar men 12 aqpan aralyǵynda ótetin 12 aýdan men Oral qalasy ákiminiń eseptik kezdesýlerine óńir basshysy Altaı Kólginovtiń qatysýy josparlanyp otyr.
Oblysta barlyǵy 406 eseptik kezdesý ótpek.
