Batys Qazaqstanda asyl tuqymdy mal basyn 150 myńǵa jetkizý kózdelýde

ORAL. QazAqparat - Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynda agroónerkásip salasy da jańǵyrtylýy tıistigi atalyp ótilgen.

Bul sala boıynsha memlekettik baǵdarlamalar arqyly nesıeleý kóbeıtiletin bolady. Osyǵan oraı asyl tuqymdy mal basyn 150 myńǵa jetkizý kózdelýde. Bul týraly búgin oblys ákimi Altaı Kólginov turǵyndarmen eseptik kezdesýinde málim etti, dep habarlaıdy «QazAqparat» HAA tilshisi.

Onyń aıtýynsha, osy arqyly sút óndirý kólemin ulǵaıtý da josparlanýda.

Memleket basshysynyń aýyl sharýashylyǵy ónimderin óndirýdi arttyrý jónindegi tapsyrmasyna sáıkes, bıyl qýaty jylyna 6 myń tonnany quraıtyn qus fabrıkasyn iske qosyp, et jáne et ónimderiniń eksportyn 2,5 myń tonnaǵa deıin jetkizý oılastyrylýda. Aýdandarda 30-dan astam aýyl sharýashylyǵy kooperatıvin quryp, 505 shaǵyn mal bordaqylaý alańyn salý da qolǵa alynbaq.

Maldárigerlik stansalar men pýnktter qalpyna keltirilip, jańadan 50 mal qorymy daıyndalady jáne 8 qasapqana ashylady.