Batys Qazaqstanda «Astana Musical» memlekettik teatrynyń gastroldik sapary ótýde
ORAL. QazAqparat - «Astana Musical» memlekettik jastar teatry gastroldik sapary barysynda A.Ostrovskıı atyndaǵy oblystyq orys drama teatrynda «Shámshi» mıýzıklin qoıdy, dep habarlaıdy QazAqparat tilshisi.
Elordalyq teatr osydan úsh jyl buryn QR Mádenıet jáne sport mınıstrligi «Qazaqkontsert» memlekettik kontserttik uıymy janynan qurylǵan.
Teatrdyń kórkemdik jetekshisi, Qazaqstannyń eńbek sińirgen qaıratkeri Ashat Maemırovtiń aıtýynsha, «Shámshi» mıýzıkli - jas ujymnyń tyrnaqaldy týyndylarynyń biri.
Avtory - Mádına Omarova. Qoıǵan rejısser - Ashat Maemırov. Qazaqtyń uly kompozıtory Shámshi Qaldaıaqovtyń qasynda júrgen jazýshy Orazbek Bodyqovtyń estelikteri negizinde jazylǵan dúnıe.
Spektakl Shámshi ómiriniń qaltarys-bultarysqa toly san tustaryn, ómiri men shyǵarmashylyq jolyn kórsete otyryp, onyń azamattyq jandúnıesin ashyp kórsetedi. Búkil halqy tanyp, «vals koroly» atanǵan Shámshi Qaldaıaqovtyń joǵary bilimi bolmaǵandyqtan, ol Kompozıtorlar odaǵyna qabyldanbaıdy. Kúresker Shámshi sonda da alǵan betinen qaıtpaıdy, óziniń talantyn baǵalaıtyn halqyna senedi.
Búginde elimizdiń Gımnine aınalǵan «Meniń Qazaqstanymmen» támamdalatyn qoıylymnyń ónboıy Shámshiniń ánderimen árlenip, kórkemdelip otyrady. Mıýzıkl janrynyń ereksheligi de osynda.
Shámshi beınesinde Sultan Keńshilik, Salamat Muqashev jáne Ádilet Ábdiqadyrov kórinip, ár qyrynan tanyta bildi. Sondaı-aq teatrdyń basqa da jas ártisteri óz rólderin sátti alyp shyqty.
Teatr sonymen qatar Aq Jaıyq jurtshylyǵy nazaryna Ǵabıt Músirepovtiń «Qyz Jibek» etno-folklordyq mıýzıklin jáne Muqaǵalı Maqataevtyń «Ǵashyq júrek» poetıkalyq-mýzykalyq qoıylymyn usyndy.
Kileń jastardan quralǵan teatr Qazaqstan aımaqtary óz aldyna, osy úsh jyldyń ishinde «Qyz Jibek» mıýzıklimen bes eldiń astanasyn, atap aıtqanda Berlın (Germanııa), Parıj (Frantsııa), Vena (Avstrııa), Brıýssel (Belgııa) jáne Máskeý (Reseı) qalalaryn gastrodik týrnemen aralap úlgeren.
«Elbasymyz jarııalaǵan Jastar jyly aıasynda elimizdiń birneshe óńirinde bolmaqshymyz. Batys Qazaqstannan keıin Aqtóbe, Qyzylorda oblystarynan óner saparymen barmaqshymyz. Mundaǵy maqsat - qazaqtyń mýzykamen árlengen ónerin nasıhattaý, uly tulǵalarymyzdy halqymyzǵa keńinen tanyta túsý», - dedi QazAqparat tilshisine Ashat Maemırov.
