Batys Qazaqstanda, ásirese, jol men aýyz sý máselesin sheshýge basa kóńil bólý qajet - Baqytjan Saǵyntaev

Bul týraly BQO-ǵa jumys sapary kezinde «Nurly jer» baǵdarlamasyn júzege asyrý máselelerine arnalǵan jıynda Úkimet basshysy Baqytjan Saǵyntaev málim etti, dep habarlaıdy «QazAqparat» HAA tilshisi.

 

Onyń atap ótkenindeı, Elbasy Nursultan Nazarbaev BQO-ǵa kezekti sapary kezinde óńirdegi joldyń nasharlyǵyn aıtyp, bul jóninde naqty tapsyrma bergen bolatyn. Sodan beri oblys joldaryn kúrdeli jóndeýge qomaqty qarjy bólinip keledi. Mysaly, QR Investıtsııalar jáne damý mınıstri Jeńis Qasymbektiń keltirgen málimetine qaraǵanda, bıyl respýblıkalyq joldardy jóndeýge 17,6 mlrd., oǵan qosymsha jergilikti joldarǵa 8 mlrd. teńge bólinip otyr. «Nurly jol» baǵdarlamasyna sáıkes qaıta salynyp jatqan Oral-Tasqala-RF shekarasy joly bitkennen keıin respýblıkalyq mańyzy bar Jalpaqtal-Qaztalov-Jánibek baǵytyndaǵy jolǵa da nazar aýdarylatyn bolady. Bul baǵyttaǵy joldy jóndeýge bıyl 2 mlrd. (ótken jyly - 3 mlrd.) teńge qaraldy. Úkimet basshysy aldaǵy jyldarǵa jobalyq-smetalyq qujattama jasaǵan kezde osyndaı máselelerdi muqııat eskerýdi tapsyrdy.

 

Batys Qazaqstan oblysynyń ákimi Altaı Kólginovtiń málim etkenindeı, óńir joldary shynynda da syn kótermeıdi. Aıtalyq, ótken jyly oblystyq jáne aýdandyq joldardyń 26 paıyzy ǵana qanaǵattanarlyq deńgeıde boldy. 2016 jyly 23,5 mlrd. teńgege 292 shaqyrym jol jóndeldi. Bul baǵyttaǵy jumystar bıyl da jalǵasatyn bolady.

 

Oblystaǵy ekinshi ózekti máseleniń biri - halyqty aýyz sýmen qamtý. Memleket basshysynyń tapsyrmasyna sáıkes Úkimettiń qoldaýymen jýyq arada 54 eldi mekenge (30 myńnan astam turǵyn) aýyz sý jetkizilmekshi. Qazirgi kezde oblysta taza sýmen qamtý kórsetkishi - 36 paıyz (162 eldi meken). Bıylǵy jumystar nátıjesinde bul kórsetkish 42 paıyzǵa (186 eldi meken) jetpekshi. Sonymen qatar aldaǵy ýaqytta Jańaqala aýdanyn taza sýmen qamtý úshin kórshiles Bókeı ordasyndaǵy Qulshyq jerasty sý qorynan qubyr tartylmaqshy. Sonda aýdan halqynyń 70 paıyzy aýyz sýmen qamtylady.

 

«Memlekettik baǵdarlamalardyń, sonyń ishinde «Nurly jerdiń» júzege asýy óńir ekonomıkasynyń damýyna qosymsha kúsh qosatyny anyq. Aıtalyq, bul baǵdarlama boıynsha salynatyn turǵyn úı qurylystaryna 15 myńnan astam adam jumys jasaıtyn «Batys Qazaqstan mashına jasaý kompanııasy» AQ, «Alageým Elektrık», «Stroıkombınat», «Gıdromash Orıon», «Steklo-servıs», «Agran», Oral kirpish zaýyty syndy jergilikti iri kompanııalar tartylatyn bolady. «Bolashaq-T» men «SV Plıýs» JShS sekildi eki úı qurylysy kombınatynyń óndiristik qýaty 90 myń sharshy metr turǵyn úıge jetedi. Jumystarǵa oblystaǵy shaǵyn qurylys kásiporyndary da qatysatyn bolady», dedi Altaı Kólginov. 

Jıynda sondaı-aq QR Densaýlyq saqtaý mınıstri Eljan Birtanov,  QR Bilim jáne ǵylym mınıstri Erlan Saǵadıev, QR Eńbek jáne halyqty áleýmettik qorǵaý mınıstri Tamara Dúısenova óz salalary boıynsha atqarylǵan jumystar jóninde aıtyp berdi. Atyraý, Mańǵystaý, Aqtóbe oblystarynyń ókilderi de sóz aldy.

 

Premer-Mınıstr jıyn barysynda memlekettik baǵdarlamalardy oryndaý barysyndaǵy kemshin tustarǵa da nazar aýdaryp, olqylyqtardy tez túzetýdi talap etti.

«Halyqpen aqyldasa otyryp, Elbasy tapsyrmalaryn oryndaı bilýimiz qajet. Bul joly Batys Qazaqstan oblysyna negizinen áleýmettik salaǵa qatysty mınıstrler keldi. Investıtsııa tartyp, ekonomıkany nyǵaıtýmen birge halyqtyń densaýlyǵyn, bilimin, áleýmettik jaǵdaıyn umytpaýymyz kerek. Biz búgin Batys Qazaqstan oblysynda Elbasy tapsyrmalaryna sáıkes kóz qýantyp, júrekti jylytatyn isterdiń atqarylyp jatqanyn kórdik. Kásipkerlermen bir saǵattan astam ýaqyt boıy pikirlesip, kóptegen qordalanǵan máselelerdiń bar ekendigin aıqyn sezindik. Munyń bárin Astanaǵa barǵannan keıin bir júıege keltirip, jumystanatyn bolamyz. Sonyń ishinde tez arada sheshilýi tıis máselelerge basa nazar aýdarmaqshymyz. Munyń bári de halyqtyń qamy úshin», dedi Baqytjan Saǵyntaev.