Batys Qazaqstanda alǵash ret «Shalqar tolqyny» án baıqaýy uıymdastyryldy
ORAL. QazAqparat - Terekti aýdanyna qarasty elimizge tanymal, sýy shıpaly Shalqar kóliniń jaǵasynda «Shalqar tolqyny» án baıqaýy márege jetip, qorytyndy gala-kontsert qoıylyp, jeńimpaz-júldegerler marapattaldy, dep habarlaıdy «QazAqparat» tilshisi.
BQO mádenıet, muraǵattar jáne qujattama basqarmasy men aýdan ákimdiginiń qoldaýymen Terekti aýdandyq mádenı-demalys ortalyǵy alǵash ret uıymdastyrǵan án saıysyna oblystaǵy 13 jas ánshi qatysyp, baq synady. Baıqaýdyń birinshi kezeńinde úmitkerler patrıottyq baǵyttaǵy ánderdi oryndady. Kól jaǵasynda oryn tepken Saryómir aýylyndaǵy mádenıet úıinde ıne shanshar oryn bolmady. Saıystyń ekinshi kezeńinde qatysýshylar óz tańdaýy boıynsha án shyrqap, qalyń kórermenniń qoshemetine bólendi.
Baıqaý qorytyndysynda Terekti aýdanynyń júırigi, eń jas qatysýshy Eljas Maǵzom bas júldeni jeńip aldy. Eljas - jas bolǵanymen, kóptegen dodalarda shyńdalǵan ánshi. Sonyń ishinde respýblıkalyq «Mýzart Life" jobasynda óz ónerin kórsetip, mamandardyń jaqsy baǵasyn aldy. Jeńimpaz án oryndaý sheberligi, sahna mádenıetin jetik meńgerýi jáne ártistik qabiletimen erekshelendi. Sondaı-aq Oral qalasy atynan synǵa túsken Taras Jaýymbaev birinshi, taǵy bir oraldyq Rasım Jumaǵalıev pen terektilik Damır Satybaev ekinshi, syrymdyq Asylaı Ábýǵalıeva, qaratóbelik Rústem Aqtashev jáne aqsaılyq Gúlsezim Qýanyshqalıeva úshinshi orynǵa ıe boldy. Zelenov aýdanynan kelgen «Nur-Ádil» dýeti «Kórermender kózaıymy» atalymyn enshilese, basqa qatysýshylar alǵyshatpen marapattaldy.
Shara sońynda aýdan ákimi Kárim Jaqypovtyń atap ótkenindeı, «Shalqar tolqyny» baıqaýyn aldaǵy ýaqytta jyl saıyn uıymdastyryp, respýblıkalyq deńgeıge jetkizý josparlanýda.
