Batys Qazaqstanda aldaǵy jyly 18 aýyl ákimi jańadan saılanady

ORAL. QazAqparat – Batys Qazaqstan oblysynda aldaǵy jyly 18 aýyl ákimi jańadan saılanady, dep habarlaıdy QazAqparat tilshisi.

BQO aýmaqtyq saılaý komıssııasynyń tóraǵasy Ǵaısa Qapaqovtyń óńirlik kommýnıkatsııalar qyzmeti alańynda ótken brıfıngide málim etkenindeı, Oral qalasy jáne Jańaqala men Tasqaladan basqa 10 aýdanda saılaý ótedi.

Onyń aıtýynsha, bıyl Prezıdent Qasym-Jomart Toqaevtyń bastamasy boıynsha oblysta 42 aýyldyq okrýgte jańa ákimder saılandy.

Óńirde barlyǵy 151 aýyl ákimi bolsa, ortasha eseppen alǵanda, sonyń úshten biri jańardy deýge bolady.

Ekinshiden, halyq aýyl ákimderin saılaýǵa belsendi qatysty. Ortasha qatysý kórsetkishi 76,7 paıyz bolsa, Kaztalov aýdany Taldyapan aýyldyq okrýginde 96,7 paıyzǵa jetti.

«Saılaý naýqany barysynda 113 adam usynyldy. Sonyń 32-si Nur Otan partııasynyń ókilderi bolsa, sodan keıingi orynda – ózin-ózi usynǵandar (12). Bir orynǵa 2,79 adamnan keldi. Saılaý qorytyndysymen ákim bolǵandardyń 28-i – Nur Otan músheleri, bireýi – Jalpyulttyq sotsıal-demokratııalyq partııa, taǵy bireýi – «Aýyl» partııasynan, 12-si – ózin-ózi usynǵandar. Burynnan óz qyzmetin atqaryp kele jatqan 22 ákim qaıta saılaýǵa tússe, sonyń úsheýi óte almaı qaldy. Saılanǵandardyń teń jartysynan astamy – jańadan kelgender. Endi olarǵa ózin jaqsy qyrynan kórsetip, halyq senimin aqtaýǵa múmkindikteri jetkilikti», dedi Ǵ.Qapaqov.