Batys Qazaqstanda alaman báıgeniń bas júldesine 2 mln teńge tigilip otyr

ORAL. QazAqparat - 23 qyrkúıek kúni «Rýhanı jańǵyrý» baǵdarlamasy aıasynda Syrym aýdany ortalyǵy Jympıty aýylynda ataqty sheshen, el bastaǵan kósem ári batyr Syrym Datulynyń 275 jyldyǵyna arnalǵan mádenı-kópshilik sharalar ótedi, dep habarlaıdy «QazAqparat» tilshisi.

Mereıtoıǵa kelgender aldymen Alash jáne Syrym Datuly atyndaǵy tarıhı-ólketaný mýzeıinde bolyp, qundy jádigerlermen tanysady. Sodan keıin dala qyzyqtaryn (at báıgesi, kúres, ulttyq oıyndar), teatrlandyrylǵan qoıylymdar men merekelik kontsertti tamashalaıdy.

Aýdan ákimdiginen túsken málimetke qaraǵanda, toıtóbede ótetin 25 shaqyrymdyq úlken alaman báıge jeńimpazyna 2 mln, 2-oryn ıegerine 1 mln, úshinshi kelgenge 700 myń teńge berilmekshi. Sol sekildi qazaqy attar arasyndaǵy 25 shaqyrymdyq kishi alamanda júldeler sáıkesinshe 1 mln, 700 myń jáne 500 myń teńge kóleminde tigilip otyr. Al 6 shaqyrymdyq taı jarysynda ozyp shyqqandar 100 myń, 70 myń jáne 50 myń teńgeden alady. Oǵan qosa qazaq kúresinen oblystyq ashyq týrnırde alǵashqy úsh oryndy ıelengen palýandar da qur qalmaı, olarǵa 300 myń, 200 myń jáne 100 myń teńgeden beriletin bolady.