Batys Qazaqstanda aqyn Saǵat Ábdýǵalıevtiń músini qoıyldy
ORAL. QazAqparat - Batys Qazaqstan oblysynda ómirden erte ketken aqyn Saǵat Ábdýǵalıevtiń (1948-1984) músini ashyldy, dep habarlaıdy QazAqparat tilshisi.
Budan 70 jyl buryn Taıpaq topyraǵynda dúnıe esigin ashqan Saǵattyń aqyndyq joly ońaı bolǵan joq. Kózi tirisinde jınaǵyn da shyǵaryp, úlgere almady.
Qadyr Myrza Álı Saǵat Ábdýǵalıevtiń «Qulynshaq kóktem» atty óleńder jınaǵyna joǵary baǵa berip, «Bul - ádebıetke ónerimen de, bilimimen de barynsha daıyn kelgen tulǵa. Taqyryp tańdaýynyń ózinde úlken talǵam, ony jup-jumyr etip jazýynyń ózinde úlken ádebı mádenıet jatyr» dep, aq jol tilegenmen, kitaby baspadan shyqqan joq.
Týǵan eli «Taıpaqtyń Muqaǵalıy» atap ketken aqynnyń qaıtys bolǵannan keıin ǵana ár jyldary «Kózaıym keleshek», «Júregime júgi tústi jahannyń», «Janymnyń jalǵyz bulbuly» atty jınaqtary jaryq kórdi.
Aqynnyń 70 jyldyǵyna arnalǵan sharalar Aqjaıyq aýdany Taıpaq aýylynda qorytyndylanyp, osyndaǵy saıabaqqa músini ornatyldy. Onyń avtory - oraldyq músinshi Dmıtrıı Baımuqashev.
Mádenıet úıinde ótken jyr merekesinde sharaǵa Astanadan arnaıy kelgen belgili aqyn, Qazaqstan Jazýshylar odaǵynyń múshesi, L.Gýmılev atyndaǵy Eýrazııa ulttyq ýnıversıtetiniń professory Janat Áskerbekqyzy S.Ábdýǵalıevti ulyqtaǵan Aq Jaıyq eline alǵysyn bildirip, Saǵatqa arnaǵan óleńin oqydy.
Qadyr Myrza Álı atyndaǵy oblystyq mádenıet jáne óner ortalyǵy men Aqjaıyq aýdany ákimdiginiń uıytqy bolýymen uıymdastyrylǵan «Kindikjurt - Qazaqstanym» atty aımaqtyq-respýblıkalyq jyr músháırasy da qorytyndylanyp, jeńimpaz-júldegerler marapattaldy.
Óleń báıgesine Mańǵystaý, Aqtóbe, Atyraý jáne Batys Qazaqstan oblystarynan 28 úmitker qatysyp, sonyń 8-i júldege ilikti.
Qazylar alqasynyń sheshimimen Jańaqala aýdanynan túlep ushqan, qazirgi kezde M.Ótemisov atyndaǵy Batys Qazaqstan memlekettik ýnıversıtetinde oqıtyn Márlen Ǵılymhan bas júldege (150 myń teńge) laıyq dep tabyldy. Qazaqstan Jazýshylar odaǵynyń múshesi, oraldyq Amangeldi Shahın birinshi (100 myń teńge), Atyraý oblysy Inder aýdanynyń túlegi, M.Ótemisov atyndaǵy BQMÝ-dyń taǵy bir stýdenti Asylaı Nııazbaeva ekinshi (75 myń teńge), mańǵystaýlyq Jumagúl Mursalova úshinshi (50 myń teńge) orynǵa ıe boldy. Sondaı-aq J.Moldaǵalıev atyndaǵy júldemen Jańaózen qalasynan kelgen Altynbek Álibaev, H.Esenjanov atyndaǵy syılyqpen terektilik Ádilet Orynbasarov, S.Seıitov atyndaǵy júldemen jánibektik Nazgúl Kárimova, H.Ábilov atyndaǵy syılyqpen aqjaıyqtyq Bekbolat Qalenov (30 myń teńgeden) marapattaldy.
