Batys Qazaqstanda Aqsaı qalasynyń 50 jyldyǵy toılandy
Aýdan turǵyndaryn merekemen quttyqtaǵan oblys basshysy Elbasy tapsyrmasyna sáıkes óńirde qaı salada da jańalyq-ózgerister bolyp jatqandyǵyn, sonyń ishinde «Rýhanı jańǵyrý» baǵdarlamasyna sáıkes ólkeniń tarıhyn túgendeý, tanymal tulǵalaryn qurmetteý jáne týǵan jerdi túletý baǵytynda kóptegen jumystar qolǵa alynyp jatqandyǵyn jetkizdi. Budan irge kótergenine jarty ǵasyr tolǵan Aqsaı qalasy da tys qalyp otyrǵan joq. Qalanyń ótkeni bútindelip, búgini ajarlanýda. Erteńi odan da jarqyn bolary sózsiz.
Saltanatty sharalar barysynda bir top azamattarǵa mereıtoılyq medaldarmen qatar «Bórli aýdanynyń qurmetti azamaty» ataǵy berilip, tósbelgiler tabys etildi.
Altaı Kólginov sapary barysynda «Aqsaıgazservıs» AQ-da bolyp, kompanııa ujymyn qala kúnimen quttyqtady. Sondaı-aq «Qarashyǵanaq-1» shaǵynaýdanynda Berezov pen Bestaý aýyly turǵyndaryna arnalyp, salynyp jatqan 153 páterlik 9 qabatty úıdiń qurylysymen tanysty. Bul úı aldaǵy qazan aıynda paıdalanýǵa berilmekshi. Al qalaǵa irgeles Araltal aýylynda 100 úı boı kótergen bolatyn. Munda 85 otbasyǵa páter kilti berilip, sonyń 67-si ornalasyp úlgerdi. Berezov pen Bestaý aýyldary turǵyndary bıylǵy jyl sońyna deıin túgel kóshetin bolady.
Sonymen qatar Aqsaı qalasynyń 50 jyldyǵyna oraı «Qarashyǵanaq» dene shynyqtyrý-saýyqtyrý kesheni ashyldy. Bul nysan qurylysyna «QPO b.v.» kompanııasy áleýmettik-ınfraqurylymdyq damý baǵdarlamasy aıasynda 860 mln teńge bólgen bolatyn. Sport kesheninde 1200 kórermenge oryndyq bar. Jeńil atletıkaǵa arnalǵan júgirý jolaǵy, fýtbol, voleıbol, tennıs alańdary daıyn. Jalpy, keshende turǵyndar sporttyń 15 túrimen aınalysa alady.