Batys Qazaqstanda adamdardyń kepildikke alynǵandyǵy jónindegi habar jalǵan bolyp shyqty
ORAL. 18 mamyr. QazAqparat - 17 mamyr kúni Kazachenko degen Aqsaı qalasynyń turǵyny óziniń eki týysy, Reseı azamattaryn belgisiz bireýler kepildikke alyp, Oral jaqqa bet aldy dep habarlaǵan.
Oblystyq ishki ister departamenti jedel basqarý ortalyǵynyń bastyǵy Igor Gýrtovoıdyń málimdeýinshe, dabyl boıynsha ІІD, Oral qalalyq, sondaı-aq Bórli, Terekti, Syrym aýdandyq ishki ister bólimderiniń jeke quramy aıaǵynan tik turǵan. «Qylmyskerler men kepilge alynǵandardy» bosatýǵa barlyǵy 285 polıtsııa qyzmetkeri men 54 avtokólik jumyldyrylǵan.
Quqyq qorǵaýshylar 1,5 saǵat boıy Fedorov aýyly tusynda joldan ótken reseılik nómirli avtokólikterdi toqtatyp, tekserý júrgizdi. Nátıjesinde kúdiktiler qolǵa tústi.
Oqıǵanyń mán-jaıyn anyqtaý úshin olar Bórli aýdandyq ishki ister bólimine jetkizildi. Ustalǵandardy tekserý barysynda bulardan adam ómirine qater tóndiretindeı eshqandaı qarý-jaraq tabylmady. Osy oqıǵaǵa qatysy bar adamdardyń aıtýynsha, Aqsaı qalasynyń A. esimdi turǵyny Reseı azamatynan elektr quralyn (bolgarka) satyp alady. Úıine baryp qarasa, qural jumys istemeıtin bolyp shyǵady. Buǵan renjigen ol satýshyǵa baryp, quralynyń jaramsyz ekenin aıtady. Sóıtedi de, qajetsiz quraldy ıesine tapsyryp, odan óziniń aqshasyn keri qaıtarýyn talap etedi. Bundaıdy kútpegen Reseı azamaty sasyp qalyp, óz avtokóligine minip alady da, qasha jóneledi. Al talap etýshi onyń artynan qýady. Osy eki arada jaqyndarymen uıaly telefon arqyly baılanysqan áıel bolǵan jaǵdaıdy durys túsinbeı qalady. Ol jaqyndaryn bireýler mashınaǵa eriksiz salyp alyp, urlap áketti dep oılap, jalma-jan ishki ister bóliminiń qyzmetkerinen kómek surapty.
Qazirgi ýaqytta bul is boıynsha tekserý isi júrgizilýde.
