Batys Qazaqstanda 88 eldi mekendi sý basýy múmkin
ORAL. QazAqparat - Batys Qazaqstan oblysynda aldaǵy kóktemde sý basý qaýpi joǵary, dep habarlaıdy QazAqparat tilshisi.
Oblystyq TJ departamentiniń bastyǵy Jasulan Jumashevtiń aıtýynsha, bıyl qardyń ádettegiden birneshe ese kóp jaýýyna baılanysty jaǵdaı, ásirese, Oral qalasy, sondaı-aq Tasqala, Báıterek, Qaztalov aýdandarynda kúrdeli.
Oblystyq tótenshe jaǵdaılar jónindegi komıssııa otyrysynda óńirdegi 36 myńnan astam turǵyn mekendeıtin 88 eldi mekendi sý basý qaýpi bar ekeni belgili boldy. Qardyń bıiktigi ótken jyldarmen salystyrǵanda, 1,5-3 esege deıin artyq.
Oral qalasynda aıryqsha nazar aýdarýdy qajet etetin aýmaqtyń biri - saıajaılar ekendigi belgili. Ótken jyly saıajaılardy 13 myń adam turaqty mekendese, bıyl 14 myńnan asty, olardyń 5 myńy - balalar. Sý basý qaýpi tóngen jaǵdaıda olardy kóshirý qajettigi týyndaıdy.
«Qazgıdromet» RMK BQO fılıalynyń dırektory Nurjan Shııaptyń sózine qaraǵanda, qardyń bıiktigi Jánibek aýdanynda 33, Tasqalada 56, al Oral qalasynda 60 santımetrge jetken. Oǵan qosa qardaǵy ylǵal qory da joǵary bolyp otyr. Mysaly, Oralda 125 mm (qalypty mólsheri 59 mm), Tasqalada 134 mm (qalyptysy 78 mm), Báıterek aýdanynyń ıAnvartsev aýyly men Jánibek aýdanynda 86 mm-ge jetken. Al tońnyń tereńdigi kerisinshe jyldaǵydan birneshe ese kem. Kúzgi ylǵal jetkiliksiz bolǵandyqtan, jalpy ylǵal qorynyń 20-30 paıyzy topyraqqa sińýi múmkin. Degenmen aldaǵy aılarda da jaýyn-shashyn túsetindigin eskerý kerek. Oblys ózenderi naýryzdyń úshinshi onkúndigi men sáýirdiń úshinshi onkúndigi aralyǵynda tasyp, «minez kórsetýi» yqtımal. Ózenderdegi ylǵal qorynyń mólsheri qalypty deńgeıden 100 paıyzǵa kóp. Onyń ústine qardyń ylǵal qory eki esege artyp, 545 mln tekshe metrge (qalypty mólsheri 256 mln tekshe metr) jetip otyr.
Aıta keteıik, mundaı qalyń qar qory oblysta sońǵy otyz jylda bolmaǵany belgili. 1987 jyly óńirde osyndaı qarly qys bolǵan edi.
