Batys Qazaqstanda 86 myńnan astam ardager turady

ORAL. QazAqparat - Batys Qazaqstan oblysynda 86 180 ardager tirkelgen. Elbasy tapsyrmalaryn oryndaý baǵytynda óńirdiń qoǵamdyq-saıası ómirine, jas urpaq tárbıesine belsene aralasyp kele jatqan aǵa býyn ókilderi az emes. Bul týraly oblystyq qazaq drama teatrynda QR ardagerler uıymynyń 30 jyldyǵyna arnalǵan saltanatty jıynda oblys ákimi Altaı Kólginov málim etti, dep habarlaıdy «QazAqparat» tilshisi.

Óńir basshysynyń atap ótkenindeı, ardagerlerimiz - bizdiń altyn dińgegimiz. «Qarııasy bar el - qazynasy bar el», deıdi dana halqymyz. Táýelsiz elimizdiń irgesin adal eńbekpen qalaǵan ardagerlerimiz áli de qatardan qalmaı, úlgi-ónegesin kórsetip keledi. «Biz aǵa býynǵa árqashan qaryzdarmyz. Olardyń aqyl-keńesteri keıingi urpaq úshin qundylyǵyn joımaq emes. Bir ǵana mysal. Shyńǵyrlaý aýdanynda jumys saparymen bolǵan kezde soǵys jáne eńbek ardageri, 96 jastaǵy Andreı Iosıfovıch Rýdpen pikirlestim. Keıin Jeńis kúnine oraı Oraldaǵy Saltanat saraıyndaǵy merekelik sharaǵa arnaıy keldi. Qarapaıym eńbek adamy oblys ortalyǵynda otyz jyldan beri bolmaǵan eken. Sodan beri, árıne, elimiz qarqyndy damý ústinde, qala, eldi mekenderimiz ózgerýde. Osyny kórip, shattanǵan Andreı Iosıfovıch: «Tek qana eńbek etý, sony talap etý kerek. Mysaly, men osynda kelgenimmen, kartop otyrǵyzý sekildi baý-baqshadaǵy jumystarym qalyp qoıdy», dep, rııasyz shynyn aıtty. Mine, toqsan altyǵa kelse de, eńbekten qala qoımaǵan osyndaı jandardan úlgi alý kerek. Sonda Elbasymyzdyń «Jalpyǵa ortaq eńbek qoǵamyna qaraı 20 qadam» baǵdarlamasy júzege asady», dedi ákim.

Oblystyq ardagerler keńesiniń tóraǵasy Myrzaǵalı Muhambetovtiń sózine qaraǵanda, óńirde 68 myńnan astam ardager (sonyń ishinde 143 Uly Otan soǵysyna qatysýshy, 9 myńnan astam tyl eńbekkeri, 18 fashıstik kontslagerler tutqyny) 391 bastaýysh uıymda esepte turady. Óskeleń urpaqty otanshyldyq rýhta tárbıeleýde aldyńǵy sapta júrgen maıdangerler Ivan Gapıch, Muhtar Ájiǵulov, Hamza Safın, Qalam Súıinshálıev, Venıamın Skolenko, ólketanýshy Jaısań Aqbaı jáne basqa belsendi ardagerlerdiń esimin qurmetpen ataýǵa bolady. Olar «Máńgilik el» patrıottyq aktisin, «Rýhanı jańǵyrý» baǵdarlamasyn júzege asyrýǵa budan bylaı da úlesin qosa beretin bolady.

«1986 jylǵy Jeltoqsan oqıǵasynyń yzǵary sezilip turǵan kezeńde, bir jyldan keıin qurylǵan respýblıkalyq ardagerler uıymy sodan beri óziniń maqsat-mindetin barynsha atqaryp keledi. Elimiz táýelsizdik alǵan alǵashqy jyldardaǵy qıyndyqtarǵa qaramastan, Qazaqstan zor tabystarǵa qol jetkizse, onda ardagerlerdiń de úlesi mol. Olarǵa memleket tarapynan udaıy qamqorlyq jasalyp, kóńil bólinýde. Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasynyń alty basty baǵyty bolsa, sonyń ishinde biz, ardagerler úsheýine basa nazar aýdarýdy josparlap, jumystanyp jatyrmyz. Onyń birinshisi - ulttyq kodymyz, sheshendik ónerimiz, ádet-ǵurpymyz. Salt-dástúrlerimizdiń ozyǵyn alyp, qadege jaratý baǵytynda atqarylatyn jumystar. Ekinshisi - qoǵamdyq qundylyqtardy jastardyń boıyna sińirý, olardy teris aǵymdardan saqtandyryp, aqyl-keńes aıtý. Úshinshisi - óskeleń urpaqty patrıottyq rýhta tárbıeleýge úles qosý», - dedi sharaǵa qatysqan Májilis depýtaty, respýblıkalyq ardagerler uıymy ortalyq keńesiniń tóraǵasy Baqtyqoja Іzmuhambetov.

Jıyn sońynda ardagerlerdiń bir tobyna respýblıkalyq ardagerler uıymy ortalyq keńesiniń marapattary, oblys ákiminiń alǵys hattary tabys etildi.