Batys Qazaqstanda 83 muǵalimnen koronavırýs anyqtaldy
ORAL. QazAqparat – Batys Qazaqstan oblysynda jyl basynan beri 83 muǵalimnen koronavırýs anyqtaldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti baspasóz qyzmetiniń habarlaýynsha, sondaı-aq 1 qańtardan beri 139 oqýshydan vırýs tabyldy.
Aýmaqtyq bas memlekettik sanıtar dárigerleriniń qaýlysyna sáıkes 28 mektepte 39 synyp karantınge jabyldy.
Koronavırýspen aýyrǵandardyń kópshiligi vırýsty úı oshaǵynda juqtyrǵan.
Oblysta keshe vaktsınalaý bastalyp, BQO ákiminiń orynbasary men bas memlekettik sanıtar dárigeri alǵashqylardyń qatarynda ekpe saldyrdy.
Oblystyq densaýlyq saqtaý basqarmasynyń málimetine sáıkes óńirde 8 myńdaı medıtsına qyzmetkeri, 23412 pedagog, 39605 stýdent, júrek-qan tamyrlary júıesi jáne tynys organdary aýrýlarymen dıspanserde turatyn 100926 adam, sondaı-aq medıtsınalyq-áleýmettik mekemelerdiń 2471 qyzmetkeri jáne jabyq balalar uıymdarynyń 156 mamany ekpe saldyratyn bolady.
Eske sala keteıik, budan buryn BQO-da sanıtarlyq talaptardy buzǵandarǵa 50-den astam hattama toltyrylǵanyn jazǵan bolatynbyz.
