Batys Qazaqstanda 82 myńnan astam oqýshy qashyqtan bilim alýda
ORAL. QazAqparat – Batys Qazaqstan oblysynda óńirdegi sanıtarlyq-epıdemıologııalyq ahýaldy eskere otyryp, tórtinshi toqsanda mektepterde oqytý birneshe formatta júrgizilýde, dep habarlaıdy QazAqparat tilshisi.
BQO bilim basqarmasynyń basshysy Aıgúl Myńbaevanyń óńirlik kommýnıkatsııalar qyzmeti alańynda ótken brıfıngide málim etkenindeı, oblys boıynsha 379 memlekettik mektep bolsa, sonyń 279-y shtattyq, 100-i aralas formatta jumys jasaıdy.
Aıgúl Ádilgereıqyzynyń sózine qaraǵanda, jalpy oqýshy sany 110 myńnan astam bolsa, sonyń 25,4 paıyzy (28 myńnan astamy) shtattyq rejımde, al 74,6 paıyzy (82 myńnan astamy) qashyqtan oqytylýda.
BQO bas memlekettik sanıtar dárigeriniń 30 naýryzdaǵy qaýlysyna sáıkes kontıngenti 300 oqýshyǵa deıingi aýyl mektepterinde bala sanyn 25-ten asyrmaı dástúrli túrde oqytý qarastyryldy. Al Bórli, Báıterek aýdandary men Oral qalasy mektepterinde synyptaǵy bala sany 15-ten aspaýy tıis.
Sol sekildi jalpy bilim beretin mektepterde mektepaldy jáne 1-5 synyptar aralas formatta oqytylady. 9, 11 synyptar bala sanyn 15-ten asyrmaı, aptanyń alty kúni ishinde pánderdiń 70 paıyzyn shtattyq rejımde, 30 paıyzyn aralas formatta oqıdy. Al 6,7, 8, 10 synyptar qashyqtan bilim alady.
Barlyq mekemeler sanıtaızer, antıseptıkalyq qural, termometrııa, kvarts shamdary, dıspenser, dezınfektsııalaý quraldary, aqparattyq materıaldarmen qamtamasyz etildi.
Karantın kezinde bilim sapasyn kóterý maqsatynda jáne oqýshylardyń baǵdarlamadan artta qalý deńgeıin anyqtaý jáne ony teńestirý, negizgi pánder boıynsha 15 baladan aspaıtyn toptarda shákirtterge keńester berilýde.
Qorytyndy attestattaý jáne UBT-ǵa daıyndyq boıynsha oblystyq is-sharalar jospary bekitilip, mektep bitirýshilerge onlaın konsýltatsııalar uıymdastyrylýda. Onlaın konsýltatsııalarǵa M.Ótemisov atyndaǵy Batys Qazaqstan ýnıversıteti, Jáńgir han atyndaǵy Batys Qazaqstan agrarlyq-tehnıkalyq ýnıversıteti, «Úzdik pedagogter», «Ozat tájirıbeli pedagogter», bilim ortalyqtarynyń ustazdary tartyldy.
Sondaı-aq bilim berý uıymdarynyń birinshi synybyna balalardyń ata-analarynan nemese ózge de zańdy ókilderinen qujattardy qabyldaý 1 sáýirden bastaldy jáne 1 tamyzǵa deıin jalǵasady.
«Sala boıynsha týyndaıtyn máselelerge jedel jaýap berý úshin oblystyq bilim basqarmasynyń call-ortalyǵy 1301, 87471127407 telefondary turaqty jumys isteıdi. Sonymen qatar qalalyq, aýdandyq bilim berý bólimderiniń call-ortalyqtary da bar», dedi A.Myńbaeva.
Eske sala keteıik, budan buryn Batys Qazaqstanda 434 baladan koronavırýs tabylǵanyn jazǵan bolatynbyz.
