Batys Qazaqstanda 680 balalar lageri jumys istep tur
BQO sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde qala syrtyndaǵy 19 lagerde 7 310, mektep janyndaǵy tamaqtanýy uıymdastyrylatyn 282 lagerde 28 282 oqýshy tynyqpaq.
Sondaı-aq mektep janyndaǵy tamaq uıymdastyrylmaıtyn 370 lager men beıindik alańdarda (59 586 oqýshy qamtylady), 9 shatyrly lagerde (2 931) balalar demalyp jatyr.
G.Kereevanyń sózine qaraǵanda, ár aýysymnyń ýaqyty 7-10 kúnge jalǵasady. Ár aýysymnyń ózindik jeke taqyryby bar.
Balalar úshin saýyqtyrý, bilim, ekologııa, shyǵarmashylyq, sporttyq baǵdarlamalar ázirlengen.
«Jazǵy saýyqtyrý lagerleriniń jumysyna qoıylatyn talaptar QR Densaýlyq saqtaý mınıstri mindetin atqarýshynyń 2022 jylǵy 10 tamyzdaǵy «Balalardyń saýyqtyrý jáne sanatorıı obektilerine qoıylatyn sanıtarııalyq-epıdemıologııalyq talaptar» sanıtarııalyq qaǵıdalaryn bekitý týraly №QR DSM-78 buıryǵymen retteledi. Osy buıryq talaptaryna sáıkes maýsymdyq saýyqtyrý lagerleriniń ashylýy úshin atalmysh nysannyń halyqtyń sanıtarııalyq-epıdemıologııalyq salaýattylyǵy salasyndaǵy normatıvtik-quqyqtyq aktilerdiń talaptaryna sáıkestigi týraly sanıtarııalyq-epıdemıologııalyq qorytyndynyń bolýy mindetti shart bolyp tabylady», - deıdi departament basshysynyń orynbasary.
Onyń aıtýynsha, qala syrtyndaǵy barlyq lagerlerge nysannyń sanıtarlyq normalarǵa sáıkestigi týraly qorytyndy berý boıynsha profılaktıkalyq baqylaý barysynda sanıtarlyq-epıdemıologııalyq qyzmet mamandary balalardyń tamaqtanýyna, medıtsınalyq qyzmet kórsetilýine, qyzmetkerlerdiń mindetti medıtsınalyq tekserip-qaraýdan ótýine, lagerde balalar úshin qaýipsiz jaǵdaılar jasaýǵa erekshe nazar aýdarady.
Sonyń ishinde aýmaqty tazalaý jáne abattandyrý, dezınfektsııalyq, dezınsektsııalyq jáne deratızatsııalyq is-sharalar, shomylý oryndarynyń, oıyn alańdarynyń jaı-kúıin tekseredi.
Osy baǵytta BQO sanıtarııalyq-epıdemıologııalyq baqylaý departamenti oblystyq bilim basqarmasymen birlese otyryp, balalardyń demalysyn sapaly jáne ýaqtyly uıymdastyrýdy qamtamasyz etý maqsatynda jazǵy saýyqtyrý uıymdarynyń qyzmetin turaqty baqylap otyrady.
Batys Qazaqstan oblysy ákiminiń orynbasary – BQO kámeletke tolmaǵandar isteri jónindegi komıssııa tóraǵasymen bekitilgen is-sharalar josparyna sáıkes maýsym boıy oblystyq bilim basqarmasymen barlyq saýyqtyrý uıymyna zerdeleý jumystaryn júrgizý josparlanǵan.
Munyń barysynda jiti ishek ınfektsııalary men taǵamnan ýlanýdyń aldyn alýǵa aıryqsha kóńil bólinedi.
Lagerlerde medıtsınalyq kabınet qarastyrylyp, tıisti qyzmetkerlermen qamtamasyz etilýi shart.
Sondaı-aq balalardyń júzýine arnalǵan modýldi-qańqaly basseınder men jaǵajaılardaǵy sý synamasynyń qorytyndysy sanıtarlyq-epıdemıologııalyq talaptarǵa saı bolýy tıis.
«Sanıtarlyq talaptardy saqtaýmen qatar lagerge jibergen kezde balada aýrýdyń syrtqy belgileriniń bar-joǵy (termometrııa, teriniń ózgerýi) tekseriledi. Sondaı-aq onyń densaýlyǵyna shaǵymdary bar-joǵy suralyp, saýyqtyrý lagerine baratyn oqýshyǵa arnalǵan medıtsınalyq anyqtama jáne ınfektsııalyq aýrýlarmen baılanysy joq degen anyqtama bar bolǵan kezde ǵana balalar jazǵy saýyqtyrý lagerlerine qabyldanady. Osy baǵytta sanıtarlyq aǵartý, túsindirý jumystaryn júrgizý jalǵasýda», dedi Gúldana Kereeva.
Eske sala keteıik, budan buryn Batys Qazaqstanda 100 myńnan astam oqýshynyń jazǵy demalyspen qamtylatynyn jazǵan bolatynbyz.
