Batys Qazaqstanda 68 myńǵa jýyq adam koronavırýsqa qarsy egildi
ORAL. QazAqparat – Batys Qazaqstan oblysynda 67981 adam koronavırýsqa qarsy vaktsınanyń birinshi komponentimen egildi, dep habarlaıdy QazAqparat tilshisi.
BQO densaýlyq saqtaý basqarmasy málim etkenindeı, 31 151 adam ekinshi komponentin alyp úlgerdi. Óńirde turǵyndardy vaktsınatsııalaý jumystary odan júrgizilip jatyr.
Basqarma málimetine qaraǵanda, qazirgi kezde «sary» aımaqta turǵan óńirde sońǵy táýlikte 75, bir aptada 612 adamnan koronavırýs anyqtaldy.
Pnevmonııaǵa shaldyqqan 324 adam statsıonarda emdelip jatyr.
Kúni búgin ınvazıvti jasandy tynys alý apparatyna 3, ınvazıvti emes qurylǵyǵa 10, ottegi kontsentratoryna 24, ortalyqtandyrylǵan ottegi kózine 90 adam qosylǵan.
«Oblysta 1123 tósektik 18 ınfektsııalyq statsıonarda 400, sonyń ishinde jansaqtaý bóliminde 32 adam jatyr. 195 tósektik 4 karantındik statsıonarda 13 naýqas bar. Ótken jylǵy qyrkúıekten beri 1275, bıyl 1070 baladan indet tabyldy. Іri kásiporyndardan «Jaıyqmunaı» JShS-da jyl basynan beri 38, «QPO b.v.» kompanııasynda 145 adamnan koronavırýs shyqty», dep habarlady vedomstvodan.
Eske sala keteıik, budan buryn BQO-da koronavırýs juqtyrǵan 27 naýqastyń jansaqtaý bóliminde jatyrǵanyn jazǵan bolatynbyz.
